O BNG demando ao goberno local que axilice xestións sobre o CEIP Recimil

O Bloque Nacionalista Galego de Ferrol demanda ao goberno local que axilice as xestións que se comprometeu a realizar de cara a buscar unha solución ao conflito do CEIP de Recimil, que cumpre xa varias semanas de protestas e reivindicacións por parte da comunidade educativa contra os recortes que están a padecer.

«O BNG-sinala nun comunicado- aproveitará a reunión da comisión informativa de educación, que se vai celebrar mañá venres, para instar ao concelleiro, Suso Basterrechea, a que concrete inmediatamente a reunión que anunciou que ían ter el e mais o alcalde, Jorge Suárez, co Conselleiro de Educación Román Rodríguez, co fin de intermediar e buscar unha solución rápida e satisfactoria aos inxustos recortes sufridos no CEIP Recimil. Desde o BNG imos reiterarlle ao concelleiro que axilice estas xestións pola urxencia e a inxustiza que supón esta falta de persoal docente nun centro de ensino público tan comprometido coa diversidade social do seu alumnado».

Desde o BNG «consideramos que esta é unha situación inxusta e inxustificable xa que estes recortes prodúcense neste centro fronte a outros centros de ensino non público. Por todo isto, queremos volver mostrar o noso apoio aos pais e nais de Recimil nesta loita incansábel por defender o dereito dos seus fillos e das súas fillas a un ensino galego público e de calidade.

Así mesmo desde o BNG consideramos urxente que se constitua o Consello Escolar Municipal para abordar desde unha óptica global a situación actual do ensino público na nosa cidade e acadar un compromiso de toda a comunidade escolar do concello contra os recortes educativos e na defensa do ensino público».