O Concello de Narón celebra un acto en conmemoración do Día Internacional do pobo xitano

O salón de plenos do Concello acolleu esta mañá un acto de conmemoración do Día Internacional do pobo xitano, unha cita que este ano se organizou dun xeito máis solemne debido a que varias familias que residen na localidade se atopan actualmente de loito.

O evento consistiu na lectura dun manifesto que un grupo de mozas xitanas que residen na localidade redactou coas súas mestras e cuxo obxectivo é reivindicar as súas demandas na sociedade. Á convocatoria acudiron a primeira tenente de alcalde e portavoz de TEGA, Marián Ferreiro; as edís de Acción Social e Igualdade, Catalina García e Teresa Sabio, e o portavoz de EU, André Abeledo.

O rexeitamento da discriminación, a demanda de igualdade e a loita contra o racismo foron algúns dos asuntos sobre os que falaron as mulleres, que defenderon as cores da súa bandeira: azul, verde e cunha roda de carro vermello para representar o ceo, o campo e a liberdade do pobo xitano no mundo, respectivamente.

O colectivo recoñeceu estar orgulloso de pertencer á súa raza e subliñou que «hai paios e paias malos e bos e xitanos e xitanas malos e bos. Niso, todos e todas somos iguais». O manifesto permanece exposto na entrada do Concello.

A concelleira de Igualdade entregoulles un agasallo ás mulleres tras dirixirse a elas para animalas para continuar «impulsando o cambio e loitando por manter a vosa identidade», dixo. Na mesma liña se pronunciou a edil de Acción Social, que destacou a labor que realiza o colectivo e animou ás protagonistas da convocatoria a continuar loitando polos seus dereitos.

Lea también

Almorzo para recadar fondos para o Centro de Recursos Solidarios de Narón

Unhas 250 persoas acudirán este sábado 30 á comida organizada para recaudar fondos para o …