A Xunta promove o emprego de maquinarias e equipamentos agrícolas en réxime asociativo

A conselleira do Medio Rural, Ángeles Vázquez, destacou hoxe que o seu departamento promove o emprego de maquinaria e equipamentos agrícolas en réxime asociativo a través de axudas por valor de 3,5 millóns de euros. Así o sinalou esta mañá durante unha visita á Sociedade Cooperativa Galega Coparma, onde estivo acompañada pola directora xeral de Gandaría, Agricultura e Industrias Agroalimentarias, Belén do Campo, e a delegada territorial da Xunta en Lugo, Raquel Arias.

A conselleira explicou que «con estas achegas preténdese fomentar o uso deste tipo de maquinaria e equipamentos, así como a introdución de novas tecnoloxías no rural, co fin de racionalizar os custes de mecanización, reducir as emisións contaminantes e fomentar o aforro enerxético». Deste xeito, engadiu, «promóvese un uso sustentable da maquinaria en harmonía co medioambiente, feito que tamén redunda nunha mellora da calidade de vida no medio rural», sendo precisamente a cooperativa que hoxe visitou beneficiaria deste tipo de achegas.

Ángeles Vázquez subliñou que esta semana saíra publicada no Diario Oficial de Galicia (DOG) a convocatoria para este 2016 e destacou que «estas axudas teñen boa cabida entre o sector primario, mostra diso son os preto de 300 expedientes aceptados dende o ano 2009, o que supuxo un investimento de preto de 17,5 millóns de euros e sendo a axuda media por expediente duns 55.000 euros», sinalou.

SCG Coparma

A Sociedade Cooperativa Coparma constituíuse para dar unha correcta solución aos problemas de mecanización que tiñan un grupo de explotacións no concello lugués do Páramo, as cales apostaron por compartir a maquinaria e crear unha Cooperativa de Utilización de Maquinaria Agrícola (CUMA).

Esta cooperativa foi constituída no ano 2000 e está constituída por 8 socios, que teñen en total preto de 1.300 reses e unha superficie de traballo de 486 hectáreas. No pasado ano, esta sociedade foi beneficiaria de axudas á maquinaria por preto de 160.000 euros.

Lea también

Rivas recibe a Miguel Cárcaba, novo delegado da Axencia Tributaria de Galicia

A subdelegada do Goberno na Coruña, María Rivas, recibiu na Subdelegación ao novo delegado especial da …