O PSOE establecerá axudas polos danos ocasionados pola avespa velutina

O candidato número 5 pola Coruña para estas eleccións autonómicas, José Manuel Pérez Seco, dixo asumir «a demanda do sector da apicultura para que se estableza desde o Goberno autonómico unha liña de axudas ou compensación polo danos causados pola avespa velutina nas colmeas».

Tras reunirse co representante da Asociación Galega de Apicultores para a zona de Ortegal, Manuel Rodríguez, e co alcalde de Ortigueira, Juan Penabad, o candidato coñeceu as preocupacións dun sector especialmente azoutado nesta comarca pola acción da avespa asiática.

O representante dos apicultores explicoulle que desde abril ata xullo retiráronse na zona de Ortegal 859 niños desta especie, o que proba non só a extensión do problema, senón o bo resultado que están a dar as trampas na erradicación deste insecto.

Segundo puido saber Pérez Seco, «a instalación de trampas por persoal especializado custaríalle moitos menos cartos a administración que o uso de velenos, unhas 20 veces máis caros que aquelas” por unidade, de xeito que “a prevención non é cara e debería ser asumida pola Xunta».