Narón e Ferrol forman parte dunha rede de municipios galegos adheridos ao programa Apego

Os Concellos de Narón e Ferrol impulsan numerosas actividades enmarcadas no programa Apego, entre cuxos obxectivos están incrementar a porcentaxe de nenos e nenas que reciben o galego desde o berce e arroupar o seu uso no proceso de socialización dos menores ata os seis anos. A rede da que forman parte ambos consistorios confórmana un total de vinte e tres concellos galegos, tras sumarse á mesma na pasada primavera os da Coruña, Ames, Mazaricos, Moaña, Muros, Oleiros, Ponteceso, Rianxo, Ribadeo, Teo e Vimianzo. Xunto con Narón e Ferrol forman tamén parte desta iniciativa, desde o ano 2015, as localidades de A Baña, Carballo, Carnota, Negreira, Ourense, Pontevedra, Redondela, Rois, Santiago e Vigo.

Os responsables da área de Normalización lingüística de Narón e Ferrol, Mercedes Taibo e Álvaro Montes, respectivamente, valoraron a adhesión de once novos concellos a esta iniciativa e destacaron a boa acollida das actividades desenvolvidas nas citadas localidades a través do programa Apego.

A poboación atinxida polo programa Apego supera xa o millón de habitantes en Galicia. Unha vez que se inscriben nesta proposta as familias reciben unha caixa na que se lles facilita información e recursos en galego para formar parte da comunidade do programa. Posteriormente reciben de xeito periódico propostas para que os seus fillos se acheguen á lingua e á cultura galegas con naturalidade desde as primeiras idades. Para lograr isto, ademais dos espazos na rede onde se facilitan recursos, a través das páxinas: www.apego.gal e www.facebook.com/apego.gal, varios concellos publican materiais específicos para divulgar a oferta de actividade infantil e tamén reforzan a programación con convocatorias nas que as nenas e nenos poden aprender e relacionarse na nosa lingua.

Grazas ao medre do proxecto, coas novas incorporacións, Apego está xa producindo novos recursos, nesta ocasión materiais audiovisuais para a súa difusión nas redes. Trátase de pezas de vídeo para transmitir os obxectivos do proxecto, explicar o funcionamento ás persoas que desexen sumarse e divulgar de xeito atractivo algúns contidos que, ben seguro, as nais e pais han considerar útiles (unha canción para ir durmir composta especialmente para este proxecto, xogos de dedos, os sons dos animais, as cores, as froitas, como atar os cordóns…). A distribución destes materiais farase a partir da canle en Youtube do proxecto Apego e tamén das súas redes sociais.

O Apego mantense desde os servizos de normalización dos concellos participantes, a onde se poden dirixir as persoas que desexen máis información ou sumarse á comunidade de usuarias.

Lea también

Seleccionados os catro proxectos para as Residencias Artísticas Mariñán de Literatura e Pensamento

Francisco Rodríguez Casal, Esperanza Mariño Davila, Laura Martínez Mateo e Carmen Marina Vidal Valiña son …