En Narón apélase á concienciación cidadá para colaborar cos servizos de limpeza

O edil de Servizos  de Narón, Ibán Santalla, saíu ao paso das críticas verquidas nos últimos días respecto ao estado que presentan algúns espazos públicos da localidade.

Sobre as queixas trasladadas desde a Asociación de Veciños de Piñeiros pola situación dalgunhas parcelas o concelleiro naronés aclarou que a falla de limpeza nunha localizada en concreto nas inmediacións do supermercado Día, á que se alude desde a AVV, é unha das tarefas sobre as que leva tempo traballando o goberno local, que abriu no seu día un expediente polo mal estado de conservación no que se atopa -que foi remitido aos seus propietarios- e que actualmente segue o seu curso, non podendo actuar directamente desde o Concello ao tratarse dunha propiedade privada.

Nesa mesma parroquia a entidade veciñal denunciou o estado do parque biosaudable

localizado xunto á igrexa parroquial. Sobre esta última problemática o edil de Servizos explicou que se reparará en canto se adxudique o contrato do servizo de mantemento, actualmente en proceso de licitación. «Desde Servizos estamos día a día pendientes do estado de conservación dos parques e prazas públicas do noso municipio, para tratar de actuar ante calquera posible incidencia no menor tempo posible», recalcou. Tamén o alcalde, José Manuel Blanco, se pronunciou respecto do asunto, desmentindo o feito de que se teña solicitado este ano desde a AVV de Piñeiros, nin por Rexistro nin por teléfono, algunha reunión en Alcaldía para abordar este tipo de asuntos.

En relación co parque do Ponto, localizado entre dous edificios e ao que tamén se aludiu desde a oposición, o concelleiro explicou que cada ano coa chegada das choivas, ao estar ubicado nunha zona sombría, hai un área que presenta algúns deterioros e asegurou que se continuarán realizando periódicamente as pertinentes tarefas de limpeza.

En canto ás críticas formuladas desde o PP sobre o estado no que se atopa a praza da Gándara, Santalla indicou que «este mesmo luns nada máis ter coñecemento da queixa transmitida polos populares na Comisión puxémonos en contacto coa empresa de limpeza, Urbaser, que se desprazou ata a praza e comprobou o estado da fonte, na que había uns papeis que se retiraron». O concelleiro explicou que «un barrendeiro da empresa retira cada día, de luns a sábado, papeis e outros restos desa fonte». Tamén aclarou o edil de Servizos, en relación á limpeza desta instalación, que «dous días á semana unha brigada quita as follas que caen na fonte e unha vez ao mes vacíase para renovar a auga por completo».

Santalla apelou unha vez máis a «concienciación cidadá» para poder ter unha cidade nunhas condicións óptimas de limpeza. «Da praza da Gándara teñen retirado ata sillas os servizos de limpeza e da ubicada na de Xuvia botellas de cristal», denunciou. O edil subliñou que «o Concello debe poñer todos os medios ao seu alcance para ter os espazos públicos o máis limpos e nas mellores condicións posibles, pero é imprescindible a colaboración cidadá porque no caso de que a xente non se conciencie e deixe de practicar determinadas conductas esas zonas poden estar sucias ao pouco tempo de limpalas».