Galería Sargadelos, unha triste perda para Ferrol

O 19 de Xuño de 1990 inaugurouse a Galería Sargadelos nun local da rúa Dolores de Ferrol. Anos máis tarde a Galería pasou ao actual local que ven ocupando na rúa Rubalcava, esquina rúa María. Deste xeito, durante máis de 26 anos de presenza en Ferrol, a Galería Sargadelos foi un referente da vida artística, cultural e social de Ferrol.

Ademais de dedicarse á venda de pezas dunha cerámica de fermoso deseño, tan prestixiosa e representativa da nosa terra, como é a cerámica de Sargadelos e á venda de variados libros en idioma galego e de temática sobre Galicia, incluídas as coñecidas publicacións de Ediciós de Castro, durante moitos anos a Galería foi a sede de celebración dunha ampla serie de actividades culturais e sociais de Ferrol e a súa comarca.

Nunha cidade tan compartimentada como Ferrol, onde coexisten múltiples asociacións culturais e sociais de diferente signo, foi sempre a Galería Sargadelos un lugar de encontro e reunión onde celebrar calquera tipo de actividade, ben se tratase da presentación dunha publicación, dunha mesa redonda, dunha mostra de pintura ou da celebración dunha conferencia.

A Galería Sargadelos situada nun lugar céntrico da cidade, foi sempre un lugar aberto a tódalas opinións e ideas, onde ninguén se encontraba incómodo senón todo o contrario. Un lugar acolledor, onde tanto as súas primeiras xerentes Chelo Loureiro e Fina Casal como a actual xerente Sonia Montero, pasando polos seus empregados e empregadas, salientaron sempre pola súa atención e amabilidade.

Non vai a ser doado que algunha outra entidade ocupe en Ferrol o lugar da Galería Sargadelos. Sen entrar nas razóns económicas ou empresariais do seu peche, os mellores desexos do Foro de Amigos de Ferrol (F.A.F.) para os seus donos e empregados.

No nome do Foro de Amigos de Ferrol, Juan J. Burgoa

Lea también

Unas doscientas personas visitaron esta semana el MUseo de la Construcción Naval

El Museo de la Construcción Naval completará este sábado con el recorrido guiado gratuito previsto …