Narón recibirá do Plan Único da Deputación 1,8 millóns de euros ao longo do ano 2017

O alcalde de Narón, José Manuel Blanco, e os portavoces dos grupos políticos recibiron esta mañá a visita da vicepresidenta da Deputación da Coruña, Goretti Sanmartín, na que foi «a primeira vez desde que eu son alcalde e coa excepción da etapa de Pablo Villamar na vicepresidencia da institución (2007- 2011) que desde a Deputación se amosa sensibilidade cara ao noso Concello», sinalou o rexidor naronés.

A visita centrouse na valoración do Plan Único que a Deputación vén de pór en marcha e que suporá, como matizou Sanmartín, nunha partida de 1,8 millóns. A iniciativa, explicou, «ofrece ademais ao Concello unha autonomía moito máis ampla para facer e decidir en que quere investir eses cartos». A vicepresidenta da institución provincial explicou que «no Plan Único inclúese o que era o Plan de Obras e Servizos (POS), o Plan de Aforro e Investimento (PAI), os remanentes do exercicio pasado e até once liñas de subvención que anteriormente había que tramitar de xeito independente». Así, destacou que o devandito Plan «pretende tamén unha maior simplificación administrativa e estabelece unha maneira de traballar moito máis obxectiva e transparente».

A xuntanza permitiulle tamén a Sanmartín coñecer de primeira man «as suxestións a respecto doutras necesidades que poida haber no Concello, tanto en vías e travesías como noutras infraestruturas e instalacións, para traballar xa de cara ao próximo ano».

Pola súa banda, o alcalde naronés sinalou que o Plan Único «representa para Narón a culminación de algo que levabamos reclamando desde hai moitísimos anos: equidade e un baremo igual para todos os Concellos da provincia». «Agora sabemos con que cartas xogamos todos». Salientou, asimesmo, o paso que o Plan Único supón no referido á tramitación e á burocracia, xa que, dixo, «evitamos así a continua convocatoria de subvencións que multiplicaba innecesariamente o traballo de técnicos e funcionarios de ámbalas dúas administracións».

Blanco lembrou que a Deputación posúe en Narón moitísimas vías e que no decurso da xuntanza puideron abordar o estado de execución no que se atopan os proxectos da estrada do Trece e do Feal e a senda de San Xiao, entre outros. «Por primeira vez podemos falar de cousas tanxibles, de obras e proxectos concretos», rematou.

Trala reunión no Concello, a comitiva desprazouse ao Pazo da Cultura, onde a concelleira da área, Marián Ferreiro, lle mostrou á vicepresidenta da Deputación as instalacións e explicoulle o funcionamento das diferentes escolas municipais que se desenvolven neste espazo.