O BNG de Narón reclama a Fomento os investimentos para promocionar o servizo ferroviario de ancho métrico

O portavoz do grupo municipal do Bloque Nacionalista Galego de Narón, Pablo Villamar, presentou esta mañá unha moción para o seu debate no pleno ordinario de marzo na que demanda ao Ministerio de Fomento os investimentos precisos para manter e promocionar o servizo ferroviario de ancho métrico.

Após as situacións esperpénticas que se viviron ao longo da última semana, con cancelacións de servizo varias, e da paralización dun investimento de 12,5 millóns de euros este ano para o mantemento na vía e nas estacións da liña de ancho métrico, RENFE-FEVE, o BNG de Narón quere acadar o apoio da corporación para reclamar do Ministerio de Fomento unha actuación decidida a prol do tren, un medio de transporte que na comarca arrastra serios problemas estruturais aos que cómpre porlles solución.

Para o BNG, o feito de vincular as axudas de mantemento cos niveis de ocupación e rendibilidade é “unha fraude total”, xa que a supresión de revisores impide avaliar correctamente a ocupación dos diferentes servizos. Non hai que esquecer que no ano 2016 suprimíronse perto de 600 servizos, que os retrasos foron continuados e que os problemas derivados das vías e as infraestruturas –tamén a maquinaria– en mal estado son unha constante. Por non falar dunha cuestionábel política comercial, coa programación de horarios e servizos que non corresponden coas necesidades das persoas usuarias. Dende o BNG xa coñecen a estratexia: precarizar o servizo para xustificar logo o seu desmantelamento. No que atinxe ao transporte de mercadorías, a situación non é moito mellor.

Para o BNG, o ferrocarril non é só un medio de transporte máis respectuoso co medio ambiente, senón que pode constituír un elemento vertebrador do territorio e un atractivo para as zonas rurais.

Por iso os nacionalistas reclaman a Fomento os investimentos precisos para garantir o servizo de ancho métrico nas mellores condicións posíbeis e da Xunta que solicite ao Goberno do Estado a transferencia do devandito servizo para poder levar a cabo a súa promoción, coordinación e integración na rede galega de transporte ferroviario de proximidade.

Lea también

Pequeña deflagración de gas en una vivienda de Narón

Un hombre resultó herido leve en la mañana de este viernes después de producirse una …