Ana Pontón avisa aos que daban por «enterrado» ao Bloque: «En pé, forte e unido. Aquí está o BNG»

A líder do Bloque, Ana Pontón, lanzou unha mensaxe a aqueles que «desde fóra e desde dentro» daban por «morto e enterrado ao BNG». «En pié, forte e unido, loitando por Galicia, actuando na sociedade, con iniciativa política. Aquí está o BNG», manifestou tras renovar o seu liderado no BNG co 98,2 % dos votos das 1.112 persoas que referendaron a candidatura que encabezaba.

A portavoz nacional da formación nacionalista pronunciouse deste xeito durante o seu discurso de clausura na XVI Asemblea Nacional que o Bloque celebra no Palexco da Coruña. «Había persoas que propoñían retirarse aos cuarteis de inverno, pensando que o barco non estaba para navegar, outras propoñían buscar un remolcador que leva o barco ao despezamento. Nin retirado, nin despiezado. Con iniciativa e impulso está hoxe o BNG«, trasladou ao auditorio no que se reuniron máis dun milleiro de persoas este domingo.

Ana Pontón pechou o plenario no que o Bloque renovou a súa dirección e co que conclúe o seu proceso de refundación apelando á fortaleza da formación despois dos reveses electorais rexistrados en pasados comicios. Ademais, pediu á militancia que actúe con «orgullo de ser o BNG».

Así mesmo, tras recoñecer os «erros» do pasado, subliñou que se en algo nunca se equivocou o Bloque foi «en estar á beira de Galicia e das súas maiorías sociais«. «Aquí estamos para remar xuntos. Coas portas abertas a todos os galegos que senten que, hoxe máis que nunca, Galicia necesita dunha gran organización galega, que teña a súa cabeza e o seu corazón nesta terra. Porque se nalgún país é necesario o nacionalismo, ese país é Galicia«, sinalou.

OS «IMPRESCINDIBLES»

Ao termo da XVI Asemblea Nacional coa que o BNG finaliza a refundación emprendida no plenario do pasado ano, Ana Pontón tamén se referiu aos homes e mulleres que formaron a fronte nacionalista «hai 35 anos» e agradeceu o traballo daqueles que «loitaron» na casa nacionalista «o tempo que fose e na época que fose».

Con todo, citou a Berthold Brecht para lembrar que «os imprescindibles» son aqueles que «loitan toda a vida». «E a esas persoas quero darvos unha sentida homenaxe e pedirvos que sigades loitando e achegando», manifestou dúas semanas despois de que se coñecese que o anterior portavoz nacional da formación, Xavier Vence, pedía a baixa por diferenzas coa organización.

ras iso, apostou por «mirar sobre todo ao futuro» e deu a benvida a FOGA así como ás 400 persoas que se incorporaron á militancia desde as pasadas eleccións autonómicas, nas que o BNG mantivo o Grupo Parlamentario na Cámara galega ao alcanzar os seis deputados.

«Aproveitar ese caudal inesgotable de amor ao país, de análise política, de saber facer, de entrega desinteresada, que existe dentro do BNG é a nosa base social, é a clave para encarar con éxito os retos que temos de futuro», manifestou.

CRÍTICAS A OUTRAS FORZAS E AO PP

No seu discurso, Ana Pontón expresou que «corren malos tempos» nos que os cidadáns «buscan alternativas, solucións a unha crise que non causaron pero da que padecen duramente as súas consecuencias». «Ese é o caldo de cultivo de movementos e forzas políticas variadas, contraditorias e perigosas«, censurou.

Así, en primeiro lugar, sinalou que a situación motivou a aparición de «novos fenómenos políticos que, nuns casos son totalmente inocuos para o sistema e, noutros, como a extrema dereita, mostran a súa cara máis agresiva e perigosa».

Tras iso, cargou duramente contra o presidente da Xunta, Alberto Núñez Feijóo, ao que criticou que se defina como «militante de Galicia». «Pode ser militante de Galicia quen defende que os galegos paguemos ata 2048 a estafa legalizada das peaxes da AP-9? Pode ser militante de Galicia quen foi parte e arte do desfalco das caixas e da súa venda a prezo de saldo a un empresario venezolano?«, cuestionou.