Román Romero apoia o CD Narón trala arbitraxe sufrida nun partido de cadetes

O concelleiro de Deportes, Román Romero, e o presidente do Club Deportivo Narón, Juan Ramos, fixeron esta mañá pública a súa valoración do acontecido no partido de fútbol entre o Narón e o Eume das categorías cadete –14 e 15 anos– disputado o pasado 29 de abril no campo de fútbol do Cadaval. Ramos recriminou a actitude do árbitro, que calificou de “prepotente e provocadora” e lamentou que se tivese que suspender o partido na primeira parte ao quedar o clube naronés con menos xogadores dos necesarios. “Nunca vin unha arbitraxe desa magnitude porque nin intencionadamente se pode facer así”, asegurou o presidente do clube naronés.

En concreto, Ramos explicou que o colexiado “menospreciou e faltou ao respecto aos menores” e apuntou tamén a un presunto cambio na acta, donde aparecía un xogador máis no banquillo que nese mesmo día e hora estaba disputando un partido no concello das Pontes. En canto ás posibles medidas á adoptar polo sucedido, Ramos explicou que algúns pais dos rapaces do clube naronés están estudando a posibilidade de levar a cabo accións legais contra o colexiado. “Desde o Clube Deportivo Narón somos os primeiros en respectar e en querer que se respecte aos árbitros, pero non se poden consentir este tipo de actitudes”. “Confiamos en que situacións deste tipo non se repitan e tamén queremos agradecer o comportamento exemplar da afición do Narón”, subliñou Ramos.

Pola súa parte, o edil naronés amosou o apoio da Concellería de Deportes ao Club Deportivo Narón. “Queremos destacar a súa actitude ante estes feitos, xa que a pesar do acontecido, e a falta dunha xornada de liga na que o Narón partía de segundo con posiblidade de ascender a primeiro e quedou terceiro, sen posibilidade de ascenso, non se pronunciaron ata rematar a liga, e tanto a afición como a directiva mantiveron a calma e repetaron ao colectivo arbitral e ao árbitro dese partido en particular”. O edil naronés incidiu na importancia de que “este tipo de actuacións non se repitan” e destacou o feito de que, neste caso en concreto no deporte base “os árbitros teñen que ser tamén mediadores entre os dous equipos para que os rapaces xoguen e o pasen ben e que gañe quen teña que gañar”.