Fene iza a bandeira multicor como xesto de apoio e visibilización dos dereitos das persoas LGTBQI

A bandeira do arco da vella, enseña da visibilización do colectivo de persoas gais, lesbianas, transexuais, bisexuais, intersexuais e queer, ondea desde este martes mesmo na casa consistorial de Fene canda ás oficiais. O municipio expresa deste xeito o seu compromiso coa igualdade de dereitos e a normalización de calquera opción sexual. Un compromiso que tamén se pon de manifesto participando na campaña «Construíndo diversidade» impulsada pola Deputación da Coruña.

A responsable da área de Igualdade, Mª Carmen Martínez, lanzou na mañá deste martes un convite para que se sumen á campaña «todos os veciños e veciñas, empresas, asociacións, clubes de portivos e calquera entidade comprometida co respecto á diversidade e coa igualdade de dereitos».

Neste sentido, o departamento pon unha chea de material reivindicativo a disposición das persoas que queiran colaborar, como cartaces, chapas, bolsas e folletos informativos editados dentro da campaña «Construíndo diversidade». Estes artigos poden recollerse no Centro Municipal de Servizos sociais de San Valentín en horario de 8:00h a 15:00 h.

Porén, desde a concellaría faise un chamamento ao activismo individual máis alá da campaña posta en marcha pola Deputación e 31 municipios da provincia: «animamos tamen a aquelas persoas que prefiran sumarse á campaña pola súa conta e botar man da súa imaxinación e creatividade, a utilizar os materiais que queiran, bandeiras, panos, cartaces, etc.»

Segundo Mª Carmen Martínez, o obxectivo é «encher Fene coas cores do arco da vella entre os días 26 e 28 de xuño, coincidindo este último co día do Orgullo LGTBQI». Na mesma liña tamén se pronunciou a psicóloga municipal Eva Sayago -responsable do servizo de promoción da Igualdade- quen engadiu que o chamamento atende «á dignidade e o dereito de todas as persoas sobre as súas vidas, os seus corpos e, por suposto, tamén as súas sexualidades».

Lea también

“Camiño a Teixido” promoción del itinerario de San Andrés en Valdoviño

El Concello de Valdoviño pone en marcha el proyecto «Xeración de contidos turísticos e de …