Refrescante comezo do «Verán Máis Alá» de Fene

Instante da actividade – Concello de Fene

Os nenos/as do Verán Máis Alá de Fene desfrutan dende hoxe e até o vindeiro martes dun programa de actividades acuáticas na piscina de Centieiras. O obxectivo é familiarizar ás crianzas co medio acuático e, en función das súas idades, aprender ou afianzar as habilidades acuáticas básicas (respiración, flotación, propulsión, zambullidas…) e os diferentes estilos de natación.

Por grupos e quendas, todos os participantes do campus de verán do Concello de Fene irán pasando ao longo dos vindeiros días pola piscina municipal onde, ademais, está prevista unha festa acuática para eles o mércores 12 de xullo.

Trala xornada inaugural de onte, o Verán Máis Alá do Concello de Fene afronta os seus primeiros días. Segundo informan dende a Concellería de Cultura, á marxe das actividades específicas organizadas no decurso do campus, a organización diaria de cada xornada distribúese nunha primeira parte -“Bos días” – na que as nenas e os nenos se poden incorporar en calquera momento durante a franxa horaria de 8.00 a 10.00 horas da mañá. Nese tempo, os/as participantes xogan en distintos recunchos (lectura, xogos de mesa, xogos de movemento e artes plásticas) baixo a supervisión do monitorado do campamento.

Na segunda parte da xornada -Máis alá!, que se desenvolve de 10.00 a 14.30 horas- os/as participantes realizan distintas actividades e obradoiros, entre os que sempre hai actividades físicas e deportivas, artísticas e xogos.
O “Verán máis alá” de Fene é un espazo lúdico-educativo non regrado no que se practica o galego como lingua de uso, amais de “promovérense contidos transversais que respondan aos problemas sociais e que teñan presente a formación en valores: educación para a paz e a non violencia, a tolerancia, a solidariedade, a igualdade social, a igualdade entre mulleres e homes, etc”.

Amais de fomentarse o uso do galego, no campus de verán do Concello de Fene, os nenos/as participan cada día nunha ou dúas actividades nas que se potencia o uso da lingua inglesa, “co obxectivo de mellorar as competencias comunicativas orais dos e das participantes”.

O “Verán Máis Alá” 2017 desenvolverase no colexio Centieiras de Perlío até o vindeiro 28 de xullo.

Lea también

Presentación del libro “Neda, camiños de poesía”, del poeta Xoán García

La Casa da Cultura de Neda acogerá este sábado, día 27 de noviembre, la presentación de “Neda, …