Galicia Ártabra Digital Noticias de Ferrol y la comarca de Ferrolterra.
O servizo de prevención, vixiancia e extinción de incendios forestais do Concello de Fene está ao completo desde o pasado 10 de xullo. Del forman parte 4 persoas contratadas na Brigada e 3 como condutoras do vehículo motobomba, que se veñen sumar ao operario que traballa facendo rozas preventivas desde mediados de xuño. A contratación deste persoal é por un período de tres meses e encádrase no convenio de colaboración subscrito entre o organismo municipal e a Consellería do Medio Rural.
O ámbito desta colaboración é o da prevención e defensa contra incendios forestais durante os anos 2016, 2017 e 2018, cofinanciado parcialmente co Fondo Europeo Agrícola de Desenvolvemento Rural (FEADER) no marco do PDR de Galicia 2014-2020.
Os traballos preventivos incluídos no convenio serán cofinanciados por Europa nun 75%, mentres que outro 7,5% poñerao a Administración xeral do Estado e o 17,5% restante correrá por conta da Xunta de Galicia. . Estes labores de prevención veñen reflectidos dentro da medida 8.3 do Programa de Desenvolvemento Rural (PDR) 2014-2020 baixo o epígrafe «Axuda para a prevención dos danos causados aos bosques por incendios, desastres naturais e catástrofes»
Medio Rural ofreceulle ao Concello a posibilidade de acollerse ao convenio de colaboración que desde o ano 2016 ten carácter trianual, o que lles permite ás entidades locais realizar unha mellor planificación contra os lumes.
A finalidade destes convenios é triple: a conformación das brigadas -na maioría dos casos chegan aos cinco compoñentes-, o mantemento e actuación dos vehículos motobombas e a realización de tratamentos preventivos forestais en vías e camiños de titularidade municipal coa intención de minimizar o risco e os efectos dos lumes.
