O XXV Trofeo Concello de San Sadurniño volve quedar en Naraío

Instante do partido – Concello de San Sadurniño

Tarde de derbi local, o noso derbi, no campo da Veiga co gallo do XXV Trofeo de fútbol Concello de San Sadurniño que enfrontou ao equipo local, o Narahío, co CF San Sadurniño. Un trofeo que se xogou cunha calor abafante e unha entrada máis media que boa malia haber festa na parroquia. No deportivo foi un partido cunha chea de goles -marcáronse 6- que, pola contra, non foi en exceso vistoso. Porén, cumpriu co obxectivo de ofrecer momentos emocionantes entre dúas escuadras moi renovadas que andan preparando temporada na 2ª Autonómica. O marcador final, 5-1, volve deixar a copa na vitrina da UDC Narahío.

O partido comezou puntual, ás 18.00h., e cando aínda non ían dez minutos de encontro, Raúl adiantou ao Sansa cun gol que viña recompensar uns primeiros compases visitantes máis efectivos e efectistas que os do Narahío. Foi só un espellismo xa que, ao pouco, o equipo anfitrión acelerou para deter o empuxe do San Sadurniño ou, alomenos, minorar o número de veces en que se adentraba no seu terreo.

A maior presión do grupo dirixido hoxe por Fran tivo recompensa no minuto 34 co gol do empate marcado por Alejo, que aínda volvería batir a rede contraria no minuto 47 despois dun penalti buscado con habilidade por Baba.

Ao descanso chegouse cun 2-1. Pero a cousa non pararía aí. O Narahío mostrouse mellor colocado na defensa e máis puxante en ataque durante a segunda parte. E non tardou en demostralo, cun gol de Baba tan só minuto e medio despois de reanudar o encontro. 3-1 que lle daban aos da casa unha tranquilidade que souberon traducir en comodidade, desenvolvendo a partir de aí un xogo que o mesmo practicaba o toque corto e rápido que os pases en profundidade por terra e aire.

A calor que houbo durante todo o encontro levou ao árbitro a paralo en dúas ocasións, unha na primeira metade e outra na segunda. A alta temperatura -rota só por algunha brisa esporádica- fixo mella no ritmo do partido e, polo tanto, nas oportunidades de marcar dun e doutro lado. E aínda así faltaban dous goles por ver: un no minuto 28 obra do veterano do Narahío Raúl e outro cinco minutos despois marcado por Jon, que deixou o cómputo no 5-1 final e unha copa máis na vitrina da UDC, igual que o ano pasado.

Lea también

El pabellón municipal Campo da Serra acogerá el XI Campeonato de Tenis de Mesa para personas con problemas de salud mental

Los ediles de Deportes, José Oreona, y Bienestar Social, Catalina García, presentaron esta mañana junto …