Valdoviño abre as portas do primeiro Museo do Surf de España este venres

Casa da Cultura e Museo do Surf – Concello de Valdoviño

España contará, dende este venres, 1 de decembro, co seu primeiro museo adicado ó surf. O Concello de Valdoviño inaugura a partir das 20 horas o Océano Surf Museo, unhas instalacións pioneiras que marcan un novo hito do municipio na súa especial vinculación co surf e a súa historia no noso país. O alcalde, Alberto González, presidirá o acto, no que terán un papel destacado Vicente Irisarri e Jesús Busto, do Océano Surf Club e almas mater do proxecto que, ó longo deste último ano, traballaron codo con codo co Concello para facer realidade o que naceu como un soño. Jacobo Suárez, da consultora Goodlife e coordinador do proxecto, será o encargado de conducir o acto, ó que confirmaron asistencia unha longa lista de institucións, asociacións e figuras destacadas do surf en Galicia e España. Moitas delas, “mecenas” do propio museo, coa súa cesión desinteresada de pezas únicas como táboas ou licras. Así mesmo, a apertura de portas do Océano Surf Museo coincidirá no tempo coa inauguración da súa primeira exposición temporal: a colección de táboas de Enrique Artero, posible grazas á colaboración da Deputación. Tamén a institución provincial apoiou economicamente a reforma do inmoble para adaptalo, entre outros usos, como espazo museístico.

O Océano Surf Museo está ubicado na Casa da Cultura, edificio singular Premio Nacional de Arquitectura e obra do prestixioso arquitecto Manuel Gallego Jarreto. Ocupa a súa primeira planta, unha gran galería acristalada aberta á praia da Frouxeira e valerase tamén da sala de exposicións do inmoble para impulsar mostras temporais e do auditorio, como escenario de ciclos de cine, festivais de música ou charlas e congresos. A intención é, sen dúbida, convertir ó Museo nun espazo vivo e en continúa construción.

O fío conductor do Océano Surf Museo é a historia do surf en Galicia e, a partir de aí, invita ó visitante a realizar un percorrido por este deporte dende as súas orixes ata os nosos días, apoiándose para isto en textos, planos, ilustracións, pezas orixinais, fotografías e audiovisuais. E, como espazo destacado, o Pantín Classic, protagonista en exclusiva dunha das salas.

Motor económico

O alcalde, Alberto González, sinala que a intención do Concello co Océano Surf Museo é consolidar a posición de Valdoviño como destino turístico de referencia en España e Europa, aumentando a oferta de actividades culturais e deportivas, o que permitirá prolongar a estancia media dos turistas e, en consecuencia, repercutirá positivamente na hostelería, restauración, comercio e hospedaxes. Tamén, engade, favorecerá a desestacionalización do turismo e, sobre todo, consolidar e xenerar proxectos profesionais vinculados ó surf, como escolas e surfcamps.

En todo isto, subliña, nun extraordinario contexto, xa que o potencial de Valdoviño para a práctica do surf non ten límites coa diferente disposición das súas praias, orientadas a todo tipo de ventos e olas, o que facilita surfear case que os 365 días do ano. Feito que se dá en moi poucos lugares do mundo e en ningún outro de España. Precisamente, a garantía de olas e riqueza natural do municipio constitúen dúas das súas principais bazas.

Idea e financiamento

Parte da idea orixinal do Océano Surf Club e o Concello, que fai seu o proxecto, comeza a traballar nel. Presenta o proxecto á convocatoria de subvencións do GALP A Mariña-Ortegal, que aproba unha achega de 100.000 euros procedentes de fondos europeos. Pola súa banda, o Concello completa a aportación con outros 50.000 euros do orzamento municipal e logra a implicación das escolas de surf Pantín Surf Camp, Valdo Surf School, Alawa Surfcamp e o Santiago de Pantin Surf School como socios colaboradores.

Pola súa banda o Océano Surf Club cedía a súa colección única e singular de contidos, permitindo o seu propio nacemento e, a partir de aí, sumaríase unha longa lista de mecenas particulares que realizan as súas cesións, entre as que destacan as do Praia de Pantín, organizadores do Pantín Classic.

Lea también

El Club Sincro Ferrol retomó sus entrenamientos

El deporte poco a poco se vuelve a poner en marcha. Una de las primeras …