O Día do Patrimonio na comarca de Ferrolterra: O papel das nosas institucións públicas

Ferrolterra Antiga
A Real Academia Galega define patrimonio como “conxunto de cousas materiais ou inmateriais de certa antigüidade e importancia recoñecida, pertencente a unha colectividade”.

O pasado 16 de novembro de 2017, coma tódolos anos dende 1972, cando se asinou en París a Convención Patrimonio Mundial Cultural e Natural da UNESCO (Organización das Nacións Unidas para a Educación, a Ciencia e a Cultura), celébrase o Día Internacional do Patrimonio Mundial.

Este día, moitas cidades, vilas e pobos realizan unha morea de actividades con varias finalidades: en primeiro lugar, poñer en valor e dar a coñecer o seu patrimonio; en segundo lugar, difundir entre os seus habitantes a importancia do seu coidado; e en terceiro lugar, e non menos importante, utilizar o patrimonio como axente de dinamización socioeconómica e turística.

E non so iso, senón que esas actividades se fan de xeito coordinado entre as fundacións, museos, asociacións e sobre todo as administracións públicas (tanto locais como autonómicas), estas últimas actuando como principais organizadoras dos mesmos.

Algunhas construcións da cidade de Ferrol atópanse inmersas na candidatura a Patrimonio Mundial, algo que desexamos con todas as nosas forzas que consiga, posto que a historia da cidade e os bens da candidatura presentada así o merecen. Ademais, todos os concellos que forman a actual Ferrolterra teñen un patrimonio que poderíamos cualificar como abundante, rico, variado e transversal: abundante (pola calidade), rico e variado (polas múltiples tipoloxías, dende mámoas ata construcións militares), e transversal (de tódalas épocas históricas).

E en Ferrolterra?

Agora vai o tema desta reflexión… preguntámonos: E o día do patrimonio, que actos levaron a cabo as nosas institucións públicas en Ferrolterra? A resposta simple, ningún. Hai polo tanto moito que reflexionar.

De novo, as asociacións culturais, desinteresadamente, fixeron o traballo que deberían facer as nosas administracións. E non estamos dicindo que sexa algo exclusivo das administracións, senón que estas deben actuar como coordinadoras e proporcionar a infraestrutura, publicidade e financiación para que estas se leven a cabo.

A modo de exemplo, os actos máis preto que tivemos foron: a presentación dun libro na Fundación EXPONAV o día 22 de novembro (Ferrol), organizada por Buxa, Asociación Galega do Patrimonio Industria; e en Mugardos unha andaina cultural o día 18 de novembro, organizada pola Asociación Cultural Apelón Educación. Dentro da propia comarca non atopamos ningunha actividade máis, tendo que dirixirse a lugares máis afastados como Betanzos (no que a Asociación Amigas do Parque do Pasatempo organizou unha visita didáctica para coñecer o Pasatempo).

Como se pode ver, nunha comarca que supera os 150.000 habitantes, tan so realizáronse dous actos relacionados co Día Internacional do Patrimonio.

Algo semellante pasa o chamado día dos museos (18 de maio), no que as actividades a pesar de ser moito maiores (xa que se involucran os museos da cidade ou o propio campus de Ferrol) seguen sen ter a publicidade e transcendencia que merecen.

Sabemos que o día do patrimonio é unha simple etiqueta, pero somos conscientes que este mundo está cheo delas, polo tanto, é necesario utilizar ese día como pulo de reivindicación do noso rico patrimonio histórico e cultural. Non se trata de valorar o noso patrimonio ese día e esquecelo o resto do ano, xa que é importante recordar, que o patrimonio non é cousa dun día, senón de 365 días ao ano. As administracións locais e autonómica deben ser conscientes disto, mentres tanto, as asociacións culturais toman as rendas (e por elo, debémosllelo agradecer).

Lea también

Clases medias ferrolanas proletarizadas

Enrique Barrera Beitia Cáritas Diocesana atendió en 2016 aproximadamente a 3.300 residentes de Ferrol y …