Entran en vigor os orzamentos municipais de San Sadurniño

O Boletín Oficial da Provincia do pasado luns publicou o anuncio da aprobación definitiva dos orzamentos municipais para este ano, logo de superarse o período de exposición pública sen que se presentasen alegacións. As contas increméntanse con respecto ao ano pasado, quedando no apartado dos ingresos e dos gastos nunha cifra de 2.810.000 euros. A entrada en vigor do orzamento dalle luz verde á convocatoria das liñas de axuda para entidades culturais e deportivas do territorio, á apertura do prazo de solicitude das bolsas de estudo para ensino obrigatorio e postobrigatoiro, á publicación das axudas para familias con nenos e nenas na Escola Infantil Municipal A Rolada e á suscrición dos convenios previstos con clubs e asociacións. Este ano destínanse a estes apartados 100.000 euros.

Os orzamentos municipais son o resume das previsións de ingresos e gastos durante o exercicio anual. Entran en xogo moitas variables: o custe dos salarios do persoal, as variacións dos prezos dos combustibles e da electricidade, as transferencias que veñen doutras administracións, os prezos finais que terán as obras, as previsións de ingresos en concepto de taxas e impostos municipais… Hai que ter en conta todos estes aspectos -e moitos máis- para deseñar unhas contas que respondan ás necesidades de todo o territorio e que, ademais, manteñan o equilibrio entre o que se ingresa e o que se ten previsto gastar.

As contas do ano 2018 quedaron fixadas inicialmente en 2.810.000 euros, unha cifra que sobe un 2,74% no apartado de ingresos e un 4,27% no dos gastos con respecto ao ano pasado. O documento foi aprobado no pleno do pasado 2 de decembro cos votos favorables do equipo de goberno, a abstención do PSOE e o rexeitamento do Partido Popular.

Tal e como se puxo de manifesto naquela sesión, os ingresos proveñen na súa maioría doutras administracións. Arredor dun 65% serían recursos externos e un 35% xerados pola propia administración local, que este ano volve manter conxeladas impostos e taxas, incluso aquelas dos servizos máis deficitarios que se lle prestan á veciñanza e que o Concello conta compensar por dúas vías: racionalizando e contendo no posible o gasto e elevando a eficiencia recadatoria agora que a tarefa se delegou na Deputación.

O apartado de gastos divídese porcentualmente da seguinte maneira. Un 40,96% destínase a persoal. Son 1.150.900€ dos que algo máis de 400.000 se corresponden coa área de Servizos sociais e atención no fogar. De feito, todo o apartado de atención social supón 505.300 euros, case un 28% do orzamento municipal, incluíndo na partida a obriga de contribuír cun total de 50.000 euros ao mantemento do Centro de Día, financiado ata agora polo Consorcio Galego de Servizos de Igualdade e Benestar.

Outro 32% -905.000 euros- resérvase para gasto corrente (gastos de funcionamento do Concello, como o consumo de combustible, a electricidade dos alumeados públicos, etc.) e o 22,16% -622.000 euros- irán para investimentos en obras, principalmente para a conservación de vías e para a execución dos proxectos de reurbanización de toda a Avenida Marqués de Figueroa e da apertura da rúa que unirá o Centro de Saúde co pavillón municipal.

Axudas para entidades e bolsas de estudo

O resto dos importes do apartado de gastos son as transferencias correntes, fixadas en 100.000 euros, un 0,81% máis que en 2017. Aquí englóbanse as axudas ao tecido asociativo e deportivo do municipio -64.200 euros para subvencións e convenios nominativos- e as dirixidas a bolsas escolares e servizos de conciliación.

Para bolsas de estudos e axudas ás familias con nenos e nenas da escola infantil municipal hai reservada unha partida de 25.000 euros: 10.000 para estudos post obrigatorios, 5.000 para os obrigatorios, 8.000 para distribuír entre as familias da EIM con nenos e nenas matriculadas no curso 2017/18 e 2.000 para atender situacións especiais que poidan xurdir durante o ano en materia educativa.

Os outros 10.800 euros que completan o apartado cadran coa previsión dunha achega de 3.000 euros á entidade Seitura 22 que xestiona os fondos Leader na comarca e cos 7.800 reservados para casos de emerxencia social.

A entrada en vigor do orzamento municipal significa que nestes días se poidan suscribir os convenios nominativos con distintas entidades do territorio así como a convocar as bolsas de estudo e as subvencións para o tecido asociativo. O Concello ten previsto reunir a semana que vén aos clubs para abordar posibles cambios nas bases específicas de deportes, tal e como solicitara o Oitomil Ocio e Aventura no Consello de Participación veciñal do pasado mes de decembro.

Unha vez se lle dea forma ás bases da liña competitiva de deportes, a Xunta de Goberno Local ratificará dunha tacada todas as convocatorias e remitiraas ao Boletín Oficial da Provincia, algo que podería producirse a finais deste mes de xaneiro.

Lea también

Decomisados en Mugardos 167 kilos de vieira y los utensilios empleados para extraerlos ilegalmente

La Patrulla de Protección de la Naturaleza (Paprona) de la Guardia Civil en colaboración con …