Cabanas invita este mes a veciños e visitantes a descubrir a Ruta da Auga

O Concello de Cabanas propón este mes a veciños e visitantes descubrir a Ruta da Auga. Será no marco do calendario de rutas de sendeirismo que organiza a Concellería de Deportes os últimos sábados de mes co ánimo de dar a coñecer o rico patrimonio natural, etnográfico e arquitectónico do municipio. Así, as persoas interesadas en tomar parte na
iniciativa, completamente gratuíta, poden anotarse xa na Concellería de Deportes –pranta baixa da consistorial, enviando un correo ó enderezo cultura@cabanas.gal ou no teléfono 981 49 59 59 extensión 3-.

O sábado 24 de febreiro, ás 10 h, o punto de quedada será a casa consistorial. Dende aí, os camiñantes irán cara o aparcadoiro da igrexa de San Martiño do Porto, onde comenzarán a ruta sobre as 10,15 h. De 7,9 quilómetros e dúas horas e cuarto de duración estimada, recibe este nome porque case a metade do itinerario -3,4 kms- se realiza bordeando a canle do río Castro e, dende a parte máis elevada do trazado, pódese gozar da visión do mar. Aínda así, a ruta tamén podería coñecerse como a dos muíños, dado que no curso do río Castro, só na marxe do Concello de Cabanas, hai catalogados 34, algún deles, iso si, en estado ruinoso.