Galicia Ártabra Digital Noticias de Ferrol y la comarca de Ferrolterra.
A alcaldesa de Narón e presidenta do Padroado da Cultura, Marián Ferreiro, e a edil responsable da área, María del Carmen Espada, asistirán na tarde deste martes aos actos do Día Mundial do Teatro, que se conmemora nesta xornada.
O Auditorio municipal acollerá a partir das 20.00 horas a programación deste evento, deseñada a través da Escola de Teatro do Padroado da Cultura de Narón.
A celebración consistirá na posta en escena dunha obra sobre o nome das mulleres e a súa relación coa identidade que temos e perdemos, que se encargará de interpretar alumnado de segundo curso da citada Escola en base ao traballo realizado nas aulas de Teatro físico e Voz e dicción. A continuación, oito alumnas da Escola de Teatro, en representación dos seus respectivos grupos, porán voz aos textos cos que o alumnado dos Obradoiros municipais de Teatro de Persoas Adultas e da Escola Municipal de Formación de Actrices e Actores respostarán á pregunta: “Que é o teatro para vós?”. Actuarán con cargo a estes últimos os participantes nos obradoiros de Piñeiros, Vivendas da Mariña, Fundación Terra de Trasancos e Sedes e dos tres primeiros cursos e do Practicum da Escola de Teatro.
O acto rematará tamén co alumnado, representantes do goberno local, Silvia Casal -coordinadora dos Obradoiros Municipais de Teatro-, e Celia González -xefa de Estudos da Escola de Teatro de Narón-, que en nome da mesma lerán o Manifesto Internacional do Teatro 2018, redactado pola escritora e xornalista mexicana Sonia Berman.
O Instituto Internacional do Teatro realizou un chamamento para que se participe na conmemoración do Día Mundial do Teatro, para visibilizar nesta ocasión a intensa actividade que realizan as mulleres na escena e denunciar as desigualdades que lles afectan na área das artes escénicas. Respaldando estas reivindicacións, o Padroado da Cultura de Narón súmase á conmemoración desta data, incidindo tamén na necesidade de dar protagonismo ao rol das mulleres neste sector, en ocasións relegado dos papeis protagonistas.
