O Concello de Narón recibirá a finais deste mes en Bruxelas un dos Premios á Excelencia en Seguridade Viaria

Fot. Galicia Ártabra

O Concello de Narón vén de recibir un novo premio polas súas boas prácticas en materia de Seguridade Viaria. Así o confirmou na mañá deste martes o concelleiro de Seguridade Cidadá e Transporte Público, Guillermo Sánchez Fojo, que indicou que “hoxe mesmo recibimos no Concello a comunicación de que a Comisión Europea entregará a Narón un dos Premios á Excelencia en Seguridade Viaria (Excellence in Road Safety Awards) na modalidade de autoridades locais”. “A entrega deste novo premio é un incentivo máis para continuar traballando desde o Concello de Narón nesta mesma liña, impulsando novas accións en materia de educación e seguridade viaria con diferentes colectivos”, apuntou Sánchez Fojo, que agradeceu a concesión do premio e valorou o traballo realizado polo equipo de Educación Viaria de Narón.

O citado equipo presentou a este certame os tres proxectos implantados máis recentemente na cidade: os programas “Bica e Arrinca”, “Camiño Escolar Seguro” e “Estacionamentos disuasorios”. O impacto destas iniciativas, a aprendizaxe das mesmas e súa posible reproducción foron algúns dos apartados que se valoraron á hora de conceder os premios de boas prácticas. As accións impulsadas desde Narón, tal e como recordou o edil, diríxense tanto a bebés e menores como a preadolescentes, adultos e á Terceira Idade.

A Comisión Europea recoñece a través dos Premios á Excelencia da Seguridade Viaria as máis destacadas accións emprendidas para mellorar a Seguridade viaria e salvar vidas nas estradas europeas. Os galardóns entregaranse o vindeiro 26 de xuño na Biblioteca de Solvay, en Bruxelas, ata donde se desprazarán representantes do Concello para recibir esta nova distinción na área de Educación e Seguridade Viaria. A Comisaria Europea de Transporte, Violeta Bulc, será a encargada de entregar este galardón ao Concello de Narón, que vén a sumarse a anteriores recoñecementos pola intensa labor desenvolvida desde Narón con diferentes colectivos en materia de Educación e Seguridade Viaria.

O Concello de Narón adheriuse no ano 2016 á Carta Europea da Seguridade Viaria, dirixida pola Comunidade Europea e que constitúe, con máis de 3.400 entidades públicas e privadas, a maior plataforma de seguridade viaria da sociedade civil. A través de obxectivos como o intercambio de coñecementos e experiencias na materia dentro da UE, ou impulsar a colectivos e entidades para que tomen medidas nesa área, entre outros, apóstase por reducir o número de accidentes en estradas de aquí ata o ano 2020.

Lea también

A alcaldesa de Narón insta ao PP a respaldar a postura do goberno local e traballar para retomar o diálogo que permita construír a senda peonil e ciclista no Val

A alcaldesa de Narón, Marián Ferreiro, saíu ao paso das declaracións realizadas polo portavoz do …

Deja un comentario

Tu dirección de correo electrónico no será publicada. Los campos obligatorios están marcados con *