O Centro Torrente Ballester acolle unha mostra retrospectiva do Premio Máximo Ramos

Este ano 2018, celebramos o 25 aniversario do Premio Máximo Ramos, que comezou como premio de gravado e foi evolucionando para poder dar cabida ás novas tendencias da obra gráfica actual, un premio moi reputado –dotado con 7.000 euros- e moi valorado internacionalmente ao que este ano concorreron 130 artistas de todo o globo.

Coincidindo coa exposición das 33 obras finalistas desta edición, o Concello de Ferrol organiza unha mostra paralela no Centro Torrente Ballester. Unha mostra na que se pode comprobar que vinte e catro edicións deste premio, referente non só en Galicia senón tamén recoñecido internacionalmente, dan para moito, na acumulación de talento e calidade artística de tódalas partes do mundo.

A través desta exposición, condensada en 23 obras, poderemos apreciar tódalas artes gráficas actuais, dende o gravado xilográfico, litográfico ou a serigrafía, a propostas máis actuais como a fotografía dixital editada ou a instalación. As vinte e tres obras que a compoñen foron todas elas obras gañadoras e accésits das edicións anteriores, o que tamén nos permite, como espectadores, apreciar a evolución do premio, das obras presentadas dende os seus inicios a ata a actualidade.

Desde o Goberno local, particularmente desde a área de Cultura, teñen a teima de dar a coñecer os fondos artísticos que compoñen e integran o patrimonio municipal que é o de todos os ferroláns. “Entendemos que é unha responsabilidade e unha obriga, pola nosa parte, sacar este patrimonio dos arquivos e dar a coñecer estes fondos artísticos que son patrimonio dos ferroláns. Trátase, en suma, de poñer en valor o patrimonio artístico e cultural de toda a cidade, así coma o seu desfrute, como ferramenta de crecemento colectivo”, manifestou o concelleiro, Suso Basterrechea, que abrirá a mostra este venres 29 as 19:00 horas.