O goberno de Ferrol aproba o expediente de mellora da eficiencia enerxética da iluminación da rúa Magdalena

A Xunta de Goberno Local celebrada esta mañá aprobou o proxecto de renovación e mellora da eficiencia enerxética da iluminación pública da rúa Magdalena entre as rúas San Diego e Rubalcava, e a súa continuación ata o ámbito da Praza de Armas. O orzamento total para a execución do proxecto ascende a 315.817,02 euros.

Esta intervención permitirá reducir tanto o impacto medioambiental como os custos de mantemento e de consumo enerxético na zona de actuación ao permitir a substitución das luminarias actuais, ineficientes, por outras de tecnoloxía LED. Ademais, o proxecto implicará a reunificación dos centros de mando existentes nun único e a eliminación dos cruces aéreos das calzadas por onde pasa a instalación.

Esta intervención enmárcase dentro do conxunto de actuacións tendentes a modernizar a eficiencia enerxética da iluminación pública en toda a cidade.

Así mesmo, aprobouse o recoñecemento extraxudicial de cinco facturas por un importe inferior a 10.800 euros.