Lida Romero, veciña de Pedroso, elixida como número un da candidatura do BNG de Narón ás municipais

O Bloque Nacionalista Galego de Narón aprobou na tarde deste xoves en asemblea aberta a proposta de Lidia Romero (Pedroso, 1976) para encabezar a candidatura da organización ás eleccións municipais do ano que vén. No acto, que tivo lugar no café-teatro do Pazo da Cultura, foi presentada tamén unha primeira equipa que está a traballar coa candidata e que representa a Narón en diferentes eidos da vida social, cultural e veciñal.

Trala súa proclamación, a candidata do BNG de Narón quixo agradecer “a confianza e o apoio” refrendado pola asamblea, así como “o traballo e o compromiso nestes últimos anos do grupo municipal representado por Teresa Sabio, Pablo Villamar e Xosé Fandiño”. Tamén tivo palabras de agradecemento para as persoas “que estades aquí e que levades traballando tantos anos por esta organización”.

Romero asegurou no seu discurso que “é unha honra encabezar a candidatura do BNG en Narón, e tamén unha responsabilidade e un reto. Creo que os retos hai que afrontalos e intentar superalos e creo tamén que estou na mellor das organizacións e na mellor das compañas para facelo”, dixo.

A candidata nacionalista subliñou que o BNG “ten demostrado moitas veces que cando goberna as cousas cambian, porque temos as ideas moi claras e temos claro tamén que gobernamos para a xente”.

Nese sentido, manifestou que “nós non estamos aquí para ofrecer favores; estamos aquí para facer políticas que beneficien á maioría e non só a uns poucos. E sabemos como facelo. Temos exemplos que acaban sendo un modelo -San Sadurniño, Carballo, Pontevedra etc- e non teñades dúbidas de que en Narón moitas das políticas que se desenvolveron estes anos non terían sido posibles se non estivera o Bloque”.

“Pero non nos queremos conformar, queremos máis”, engadiu Lidia Romero. “Hai moitas cousas por cambiar e que só van cambiar se está o BNG. Temos o proxecto e a ilusión para facelo. E a partir de hoxe imos dicirlle isto á veciñanza de Narón; que o BNG está aquí para

mudar as cousas e que temos o compromiso con este concello de que imos traballar desde xa, porque miramos cara ao futuro e cremos de verdade que é posible”.

O perfil da candidata

Lidia Romero é licenciada en Pedagoxía pola Universidade de Santiago de Compostela, na especialidade social e laboral. Cursou o mestrado en Orientación e Cualificación en Competencias e é experta universitaria en Orientación sociolaboral. Ten traballado principalmente na área social, como educadora e monitora con distintos colectivos, desde infancia e mocidade até a terceira idade. Romero participou ademais como socia nunha entidade do eido educativo e formativo na planificación e implementación de programas para adolescentes (resolución de conflitos, educación afectivo-sexual etc). A súa experiencia laboral inclúe tamén a docencia de adultos e a orientación laboral en varias entidades, ocupación que desenvolve actualmente.

Ademais, Romero participa desde hai anos no tecido asociativo de Narón, en concreto desde a asociación cultural Xebra, da que é presidenta, e na Comisión Revolta Popular de Marzo de 1918, que este ano organizou os actos do centenario dos sucesos que tiveron lugar na Feira do Trece.