O relevo mixto do Triatlón Ferrol mantén cuarto ao club na Liga de Primeira División

O Club Triatlón Ferrol rematou a Liga Iberdrola de Primeira División como cuarto clasificado despois de ser sétimos este domingo no campionato de España por relevos mixtos.

Carmen Gómez non puido comezar mellor a súa posta. Saíu da auga entre as mellores, foi das que máis tirou no ciclismo e, aínda que perdeu algúns segundos na transición e foi a última do cuarteto de cabeza en comezar a correr, apertou moi cedo para entregarlle o testemuño a Marcos Ruiz en primeira posición.

O fenés aproveitou os segundos de vantaxe que tiña na natación para manterse no pelotón líder nun ciclismo cun ritmo frenético e só baixou o pistón no sector a pé, onde se enfrontaba a triatletas de nivel internacional.

Ana Carvajal, aínda que non estaba ao seu mellor nivel nunha longa temporada, cumpriu de sobra para deixar o club preto do top-5.

No relevo definitivo, Iván Puentes chegou a ter problemas coa sela da bici e non puido facer un ciclismo cómodo e na carreira o triatleta de Ferrol puido forzar para cruzar a meta oitavo da xeral e sétimo entre os equipos da Primeira División Feminina.

Desta forma, o Triatlón Ferrol rematou a Liga como o cuarto mellor club feminino de España.