Preto dun milleiro de deportistas participarán o sábado no XVII Trofeo de Atletismo Cidade de Narón e no XXX Campionato de Galicia de Marcha ao Aire Libre

Presentación dos campionatos | Concello de Narón

A décimo sétima edición do Trofeo de Atletismo Cidade de Narón e o XXX Campionato de Galicia de Marcha ao Aire Libre celebraranse este sábado, día 24, nas instalacións do Estadio Municipal de Río Seco. O concelleiro de Deportes, Román Romero, o presidente da Federación Galega de Atletismo, Isidoro Hornillos, o presidente do Club Atletismo Narón, Miguel Soto e o delegado en Ferrolterra da Federación Galega de Atletismo, Paulino Cartelle, presentaron esta mañá os eventos no Concello.

O XVII Trofeo de Atletismo Cidade de Narón, no que están inscritos uns 800 deportistas, disputarase entre as 15.30 e as 21.00 horas, e contempla varias probas de pista: lanzamento de peso (con táboa situada a tres metros) e salto de lonxitude (1.500; 1.000; 500; 400 e 60 metros lisos desde as categorías Sub 14 ata Máster).

O presidente da Federación Galega de Atletismo destacou a satisfacción da entidade por elixir Narón “un lugar emblemático do atletismo galego”, subliñou, para celebrar esta competición. Así mesmo, recordou que este será o primeiro da tempada 2018, que rematará o 31 de decembro de 2019, cunha duración, de xeito excepcional, de catorce meses. “O de Narón é un dos poucos concellos galegos que teñen pistas de atletismo, porque hai menos de vinte e cinco con elas e este é un deles”, asegurou, valorando o traballo organizativo e a traxectoria do Club Atletismo Narón, a colaboración do Concello e tamén o labor da delegación en Ferrolterra da citada Federación.

O presidente do Club Atletismo Narón, Miguel Soto, agradeceu tamén a implicación de tódalas entidades e empresas e voluntarios, así como do Concello pola súa colaboración nestes eventos deportivos e animou ás veciñas e veciños a disfrutar dos mesmos.

En canto ao XXX Campionato de Galicia de Marcha ao Aire Libre, o delegado en Ferrolterra da Federación Galega de Atletismo, Paulino Cartelle, explicou que se realiza por primera vez na cidade na modalidade de pista e avanzou que participarán no mesmo algo máis dun cento de deportistas procedentes de varios clubes galegos. Comezará ás 10.45 e participarán categorías desde Sub 10 ata Sub 23 e tamén Absolutas e Máster (masculinas e femininas) en distancias de 1.000 a 5.000 metros.

O edil de Deportes, Román Romero agradeceu na súa intervención a confianza depositada pola Federación Galega de Atletismo, para celebrar na cidade este trofeo e campionato e felicitou ao Club Atletismo Narón pola organización. Finalmente, animou tamén á veciñanza a asistir o sábado a estes eventos deportivos.

Lea también

Narón acolle o “XXIII Trofeo de Baile Deportivo Cidade de Narón” e o “Campionato Galego de Standard”

O concelleiro de Deportes, Ibán Santalla, e o presidente do Club de Baile Deportivo Narón, …