O Concello de Narón amplía o espazo verde do parque fluvial de Freixeiro

A ampliación do parque fluvial de Freixeiro, en Narón,  continúa avanzando a medida que o Consistorio adquire novas propiedades na zona. A maiores do expediente aprobado no pleno de decembro para proceder á expropiación duns 50.000 metros cadrados de terreo para enlazar esta área verde co paseo de Xuvia, o goberno local materializou outra iniciativa encamiñada a ampliar este parque da cidade. Unha das vivendas localizadas ao final da rúa Zorrilla, adquirida polo Concello o pasado ano, derribouse a semana pasada, co que o tramo do paseo gañará tanto o espazo que ocupaba o inmoble como a parcela que a rodeaba.

A vivenda atopábase nas inmediacións do río Freixeiro, nunha zona próxima a unha das pasarelas de madeira que discurren entre a zona de Freixeiro e o Cadaval. A demolición da casa e dos alpendres anexos, así como a limpeza da zona verde, permitirán agora ao goberno local, en base a unha próxima actuación, adecentar ese espazo para o desfrute das veciñas e veciños. O concelleiro de Servizos, Ibán Santalla, explicou que o adecentamento da zona correrá a cargo da empresa que realiza o mantemento do parque fluvial de Freixeiro e avanzou que se procederá a sementar herba na tempada para deixalo como zona verde.
A superficie que gañará o parque nese tramo será duns trescentos metros cadrados, tal e como apuntou o edil naronés.

A compra e demolición da vivenda é un paso máis da ampliación deste pulmón verde da cidade, que nos vindeiros meses se completará coa ampliación entre a avenida Miguel de Cervantes e Megasa, cunha senda peonil e ciclista na que se habilitarán varias áreas estanciais para o descanso de ciclistas e viandantes. O proxecto de expropiación dos terreos precisos para acometer esta iniciativa aprobouse xa no pleno e suporá un investimento de 259.019 euros, unha contía coa que se adquirirán 62 das 67 parcelas localizadas nese tramo, sendo das cinco restantes catro propiedade da Demarcación de Costas e unha do Consistorio.

Comunicar a través dunha senda o paseo fluvial de Freixeiro co de Xuvia, pola zona do muíño das Aceñas, é a finalidade desta importante actuación, sobre a que estamos xa traballando para que sexa canto antes unha realidade”, asegurou Santalla. “As veciñas e veciños de Narón e tamén doutros concellos poderán desfrutar dun área de lecer, cun importante valor natural e patrimonial, duns 70.000 metros cadrados no centro da cidade. Isto é posible porque cada ano se destinan importantes partidas ao coidado e mantemento deste tipo de espazos para que estean nas mellores condicións”, subliñou o edil de Servizos.

Lea también

Castrillón modificará la ordenanza del agua para que el consumidor no pague un importe mínimo si no hace uso del servicio

Germán Castrillón, candidato del PP a la alcaldía de Narón, informó que “modificará la Ordenanza …