Miriam Casillas volve á competición coa vista posta nos Xogos Olímpicos de Toquio

Miriam Casillas abre este domingo un apertado calendario de 2019 para tentar asegurar unha praza nos Xogos Olímpicos de Toquio.

Na Copa do Mundo de Cidade do Cabo, a pacense do Triatlón Ferrol enfrontarase á holandesa Rachel Klamer e a un potente equipo estadounidense para manter a súa boa posición no ránking olímpico. Casillas é actualmente a 38º mellor do mundo e un dos criterios da selección española para confirmar a praza en 2019 é estar no top-30 a final de ano, tarefa complicada coa competencia entre países na previa dos Xogos.

A Copa do Mundo de Cidade do Cabo celebrarase este domingo ás 13:15 horas –en horario peninsular español- en distancia esprinte de 750 metros de natación, 20 km de ciclismo e 5 km de carreira a pé.