O alcalde e as concelleiras de Turismo e Patrimonio Histórico analizaron varias melloras para o inicio do Camiño Inglés

Ángel Mato, María Teresa Deus e Eva Martínez na visita o inicio do Camiño Inglés | Concello de Ferrol

O alcalde, Ángel Mato, e as concelleiras de Turismo, María Teresa Deus, e de Patrimonio Histórico, Eva Martínez, fixeron un percorrido esta fin de semana por varias rúas de Ferrol Vello para comprobar o estado do inicio do Camiño Inglés e as súas inmediacións e detectar as necesidades de actuación nesa emblemática área urbana. O goberno municipal ten entre os seus proxectos mellorar a ruta a Santiago ao seu paso por Ferrol coa vista posta no xacobeo do 2021, que constitúe unha oportunidade única para darlle pulo ao turismo, despois de que o último ano santo fose no 2010. E moito máis, co interese que nos últimos tempos están a espertar as diferentes alternativas ao Camiño Francés. Por iso, o obxectivo é que a cidade estea preparada para recibir a un número de visitantes que se espera moito máis elevado que en anos pasados.

Mato, Deus e Martínez tamén se acercaron á oficina de turismo situada no paseo da Mariña. Alí, ademais de revisar as dependencias e algunhas necesidades que presenta, falaron co persoal que as atende e examinaron con el posibles iniciativas de cara a mellorar a atención ao público e para facer máis visibles as instalacións para as persoas que visitan a cidade. A sinalización dos puntos de maior interese é un dos aspectos, no ámbito do turismo, nos que o goberno local está a traballar coa intención de facer unha cidade moito máis amable e accesible para os visitantes. Nese senso, o alcalde e as concelleiras empezaron a analizar diferentes alternativas para indicar o inicio do Camiño Inglés, sempre en harmonía co entorno, no peirao de Curuxeiras e no paseo da Mariña, onde agora existe un fito de granito que non sempre é localizado con facilidade polos peregrinos. Esta actuación unirase á que avanzou en días pasados a concelleira de Patrimonio Histórico sobre a instalación de novas indicacións nos edificios máis destacados do barrio da Magdalena.

Durante o percorrido polas rúas de Ferrol Vello, alcalde e concelleiras falaron con varios veciños que lles achegaron diferentes demandas e suxestións, que Ángel Mato lles agradeceu e se comprometeu a estudar.

Lea también

El PP hace balance de los cien primeros días de Ángel Mato como alcalde

Este lunes se cumplen cien días desde que Ángel Mato es alcalde de Ferrol y …