Chega o festival Fóra do Mapa, “unha das citas ineludibles deste outono”

Ángel Mato, Cristina Moreira, Antonio Golpe e Julián Reina na presentación de Fóra do Mapa | Concello de Ferrol

Un edificio do arquitecto Rodolfo Ucha situado na rúa Rubalcava foi o escenario esta mañá da presentación da cuarta edición do festival Fóra do Mapa, que entre o luns 14 e o domingo 20 de outubro vai levar o teatro por diferentes espazos da cidade, moitos deles totalmente descoñecidos por tratarse do interior de edificios de propiedade privada. O alcalde, Ángel Mato, a coordinadora do festival, Cristina Moreira, e os concelleiros de Cultura, Antonio Golpe, e Urbanismo, Julián Reina, elixiron para avanzar o programa desta iniciativa teatral precisamente o lugar onde se desenvolverá o obradoiro a partir do que se creará a peza que clausurará o festival o domingo ás seis da tarde.

Neste taller, para o que aínda queda algunha praza libre, traballarán dez persoas baixo a dirección de Claudia Faci. Para anotarse será necesario enviar un currículo e unha carta de motivación a través da web do festival (www.foradomapafestival.com). O horario será de 10:00 a 14:00 desde o luns 14 ata o venres 18. “A ver en qué se inspiran, porque con esa sensibilidade que teñen os artistas, posúense pola historia das casas”, dixo Cristina Moreira, para a que ver a evolución desta acción formativa que sempre está presente en Fóra do Mapa vai ser “moi especial”.

A coordinadora deulle a esta cuarta edición o valor de supoñer a da “consolidación”, asegurou, e tamén o de comprobar que “a xente de Ferrol está volcada á hora de buscar os espazos”, algo que lle resultou “moi bonito”. “A xente xa espera o momento de Fóra do Mapa”, asegurou.

Respecto da orientación deste ano, dixo que vai ser “superfeminista” e moi variada, “un pouco para todos os públicos”. De feito, explicou que se buscaron espectáculos para que se sentira “identificada” a xente máis nova, como un de Riot Comedy. Tamén participarán artistas de Ferrol “que están moi lonxe, como Ada Fernández, que vén dende Nova York” e se encargará dunha representación o martes, mentres que no Centro Torrente Ballester haberá unha exposición de Lara Lars.

“Todo é de balde”

Dentro desta diversidade, o público terá a oportunidade de achegarse á micropoesía e a gran novidade será un espectáculo de rúa, a cargo da compañía Impás. Todo isto, unido ás pezas de microteatro no barrio da Magdalena, que marcan o carácter de Fóra do Mapa. “O máis bonito é que todos os Ferroles se xunten nun festival coma este”, que cada función a escolle “un tipo de público determinado” e que, ademais, “todo é de balde”, concluíu a coordinadora.

Para o alcalde, Ángel Mato, esta é “unha das citas ineludibles deste outono”, polo que, dixo, quen aínda non asistira nunca ao festival “ten a oportunidade única” de contemplar á vez o patrimonio histórico de Ferrol “no interior destes espazos” e a magníficos artistas teatrais. Mato mostrou o compromiso do Concello con Fóra do Mapa, un evento “consolidado” que este ano “vai ser aínda moito mellor”, xa que incluír no programa o teatro de rúa significará que a cidade “vai estar, dalgún xeito, en festa”.

O rexedor ferrolán, que confesou que sente especial devoción por esas obras de microteatro que en Fóra do Mapa se representan ante apenas trinta persoas, afirmou: “Estou completamente seguro de que quen probe vai repetir”.

Reservas e invitacións

Para asistir aos espectáculos é necesario formalizar a reserva por anticipado, ben a través da dirección de corro eléctrónico foradomapaferrol@gmail.com ou ben a través da páxina web www.foradomapafestival.com/#reserva_espectaculos, xa que o aforo é limitado. A excepción son as funcións para o mércores 16 no Centro Torrente Ballester e para o sábado 19 no Teatro Jofre. Nestes dous casos, as invitacións débense retirar no Jofre.

Lea también

Vicente Araguas presentó, en Madrid, el último poemario de Manuel Vilanova

El profesor, escritor, crítico y traductor Vicente Araguas presentó en la Delegación de la Xunta …