Narón homenaxeará o 23 de novembro ás vítimas da Covid-19 e aos colectivos de profesionais e voluntarios

A alcaldesa da cidade, Marián Ferreiro, anunciou a celebración dunha homenaxe institucional o vindeiro 23 de novembro, Día de Narón, para rendir unha homenaxe ás vítimas da Covid-19 e tamén a aqueles colectivos de profesionais e persoal voluntario que continuaron traballando tras decretarse o estado de alarma, o pasado mes de marzo, para ofrecer á cidadanía os servizos básicos. “Consideramos que o Día de Narón, unha data tan sinalada e especial para todas as nosas veciñas e veciños é o idóneo para ofrecer un recoñecemento a esas persoas que se mantiveron na primeira liña ante unha grave pandemia e, ao mesmo tempo, para recordar aos milleiros de persoas que faleceron a causa do coronavirus”, explicou Ferreiro.

A rexedora local proporá formalmente o vindeiro luns, día 27, na Xunta de Portavoces, a celebración deste evento, “para recordar ás vítimas desta grave pandemia e en recoñecemento do intenso traballo, compromiso e a xenerosidade que durante a pandemia desenvolveron os direrentes colectivos de profesionais e voluntarios na nosa cidade para atender ás nosas veciñas e veciños”. Ferreiro explicou que esta convocatoria se celebrará atendendo ás medidas preventivas da Covid-19 que nese momento estean en vigor, para ofrecer as máximas garantías sanitarias ás persoas que acudan a este acto.

“As consecuencias desta crise sanitaria foron moi graves, en primeiro lugar polas vítimas mortais desta pandemia e, tamén, pola repercusión que tivo e continúa xerando nos diferentes sectores e na sociedade en xeral”, indicou Ferreiro. “Sabemos, porque así se demostrou en múltiples ocasións, que a nosa cidade, as nosas veciñas e veciños, son moi solidarios e unha vez máis este feito constatouse co traballo e colaboración que brindaron durante todos estes meses e que continúan levando a cabo para axudar ás persoas que nestes momentos precisan axuda”, apuntou.

Ferreiro asegurou que “aquelas persoas que estiveron á fronte dos sectores que se mantiveron operativos durante o estado de alarma e tamén de servizos necesarios para a cidadanía merecen o noso máximo recoñecemento polo seu labor, por esa dedicación continuada para tratar de paliar os devastadores efectos dunha situación que era nova para todas e todos nós e na que día a día, entre todas e todos, intentamos ir salvando as dificultades que se presentaban e centrar os nosos esforzos en atender á veciñanza que máis o precisaba”. Por este motivo, indicou “cremos que non hai mellor data que o Día de Narón para que reciban esa homenaxe tan merecida e na que tamén recordemos ás persoas que lamentablemente faleceron a consecuencia desta pandemia»

Lea también

Permanece aberto no Concello de Narón o prazo de solicitude de axudas para material didáctico e comedores escolares

A concelleira de TEGA, delegada da área de Ensino de Narón, Mercedes Taibo, recorda que …

Deja un comentario

Tu dirección de correo electrónico no será publicada. Los campos obligatorios están marcados con *