Xornadas de presentación do proxecto «sistema integral de calidade turística en destinos»

A Concellería de Turismo do Concello de Ferrol, a través da Sociedade Mixta de Turismo, realiza unha presentación do proxecto SICTED -Sistema Integral de Calidade Turística en Destinos- este luns, día 6, ás 9:00 e 20:00 horas no Hotel Carrís Almirante. A xornada informativa, que será levada a cabo pola xestora SICTED, volverá a repetirse nos mesmos horarios ao día seguinte.

O proxecto de mellora da calidade dos destinos turísticos está promovido polo Instituto de Turismo de España (TurEspaña), que elaborou tamén a metodoloxía, e pola Federación Española de Municipios e Provincias (FEMP). En toda España participan no programa SICTED 103 destinos e os distintivos das empresas adheridas son recoñecidos polos turistas.

Este programa está dirixido a empresas ou servizos turísticos de ata 30 oficios diferentes, entre eles, os comercios de natureza turística, situados en zonas turísticas e que atendan turistas, co obxectivo de mellorar a experiencia e satisfacción do turista. A iniciativa, gratuíta para as empresas e organismos participantes, é un recoñecemento ao esforzo e compromiso coa calidade e a mellora continua, á vez que distingue ao establecemento fronte á competencia. Na presentación poderán inscribirse os organismo interesados, as prazas para participar como nova empresa no programa son limitadas.

Xornadas formativas

O ano pasado 26 empresas de Ferrol conseguiron os distintivos de calidade tras asistir a unhas formacións, recibir asistencia dunha consultora acreditada experta en calidade e pasar a correspondente avaliación. Ademais, estas institucións ferrolás que xa posúen o distintivo SICTED teñen prevista unha formación que versará sobre “Servizo ao Cliente” e “Lexislación turística e Lei de Protección de Datos” os mesmos días 6 e 7 ás 9:30 e 20:30 horas no Hotel Almirante. A preparación, de carácter gratuíto, será impartida polo consultor Juan Miguel Moreno Magaña, acreditado por TurEspaña.