Galicia Ártabra Digital Noticias de Ferrol y la comarca de Ferrolterra.
O BNG desenvolverá este sábado, día 5, reunións veciñais en Cervás e Chanteiro para abordar a situación derivada do feito que a Deputación non teña executado a día de hoxe o proxecto de ampliación da calzada e seguridade vial na estrada Ares-Chanteiro, que fora aprobado no ano 2008 cun orzamento de 1.798.261,74 €; e para o que se tiña feito incluso o proceso expropiatorio.
As reunións veciñais desenvolveránse o sábado ás 11,30 h. no “Centro” de Cervás e ás 13 horas no Centro Cultural “Outeiro” de Chanteiro; coa participación de representantes do BNG, nomeadamente do seu portavoz municipal, Emilio Mesías Farías.
Esta iniciativa – que non descarta mesmo medidas de presión posteriores – prodúcese logo do malestar xeral evidenciado na veciñanza logo de que se executaran recentemente as obras de reparación do firme da estrada; o que por parte de moita xente se interpreta como unha manobra da Deputación para que, coa excusa desta reparación, non se execute o proxecto aprobado no seu día e que, en realidade, sería a única solución aos problemas de seguridade vial que prantexa esta estrada.
As obras que remataron hai poucos días non só non resolven os problemas derivados dunha calzada estreita na que a duras penas poden cruzarse dous veículos e, desde logo, onde os peóns non dispoñen de espazo para circular; o que crea situación de alto perigo nos núcleos de Lubre, Cervás e Chanteiro.
Hai que lembrar, ademáis, que o pleno do concello celebrado o 27 de Setembro do pasado ano tiña aprobado unha iniciativa do BNG na que se pedía que a Deputación incluise unha partida para abordar o proxecto aprobado no seu día, e que tamén recentemente o Deputado Provincial do BNG, Xesús Soto, fixo unha petición demandando o mesmo.
