Ei, tí, parásito!

Miguel Alonso

Ei, amigo! Es novo? Estás no paro? Traballaches e agora recibes unha prestación económica? Non serves para nada, sábelo, non? Es un parásito, un mal que hai que erradicar da sociedade.

Tampouco o tomes a mal, ho! Non son eu quen che está a dicir isto, é a ínclita Mónica de Oriol, a presi do Círculo de Empresarios. Que non sabes quen é? Ah, diso si tes culpa. Son ela e os seus amigos quen mandan no país. Ou pensas que manda Rajoy?

Agora xa en serio. Como ves, poden dicir de ti o que lles pete. Crense os teus donos, capaces de decidir que ti, despois de ter traballado para eles xa non debes cobrar unha prestación por desemprego. Non te enganes. Non é un caso illado. Se o fose, os seus compañeiros obrigaríana a dimitir. Esa palabra. Dimitir. Pero non, ninguén a obrigará a irse de aí. Para que? En realidade, dixo o que pensan moitos dos que a puxeron no cargo.

Ben, para non pecar de demagogo (eu, non ela, abofé), vouche copiar as súas palabras textuais. Dixo: «Hay [en España] un millón de personas con cero cualificación y un salario mínimo y te obligan a pagarles aunque no valgan para nada». Entre outras medidas, propuxo baixar o salario mínimo (un dos máis baixos de Europa, por se non o sabes, que o saberás) e reducir o custo do despedimento a 18 días por ano traballado. Dixo tamén, amigo, que ninguén acepta un traballo se ten por diante dous anos de prestacións. Parásito. Iso che chamou.

Que si, que si, que o sei. Que xa pediu desculpas. Pero, oe, un país que está a procesar por terrorismo a un tío que fixo unha broma (que si, que si, de moi mal gusto) con Carrero Blanco (acaba de pasar, sabes?) tamén debería facer algo con este tipo de declaracións, non?