A Deputación da Coruña modifica as bases do POS

O pleno da Deputación da Coruña aprobou o pasado 12 de setembro por unanimidade as bases do Plan de Obras e Servizos para o ano 2015 coa intención de impulsar as obras e os investimentos a realizar nos concellos da provincia.

Por iso, e con respecto ao exercicio anterior, o plan inclúe novidades importantes, como é a recuperación das porcentaxes que os concellos deben destinar a obras ou a gasto corrente e amortización de débeda.

O texto refrendado pola corporación recupera así os límites incluídos no POS antes de que o actual goberno os mudara para axudar aos concellos a financiar o seu gasto corrente. É dicir, vólvese fixar nun 60% a achega para obras e investimentos e nun 40% a achega para gasto corrente ou amortización da débeda.

O actual goberno provincial tiña cambiado as bases hai dous anos debido á difícil situación económica que estaban a pasar os concellos naquel momento, aumentando as cantidades do POS que podían utilizar para facer fronte ao seu gasto corrente.

Agora, en palabras de Diego Calvo e seguindo a tendencia de “estar ao lado de todos os concellos cando máis nos necesitan”, increméntase a porcentaxe a destinar obrigatoriamente a obras co obxectivo de “fomentar os investimentos cando se empeza a notar a recuperación económica nas arcas municipais”.

ADIANTO DOS PRAZOS E “PREMIO” PARA OZA-CESURAS

Outro dos cambios está no adianto dos prazos tanto na aprobación das bases como na presentación dos proxectos por parte dos 93 concellos da provincia, que deberán achegar toda a documentación necesaria, de xeito telemático, entre o 1 de outubro e o 1 de decembro.

[Adxúntanse as tablas das achegas do POS aos concellos]

INSTRUMENTALIZACIÓN E XESTIÓN DOS CENTROS ETNOGRÁFICOS DE CURTIS E COIRÓS

O pleno tamén deu saída á renovación dos convenios que a Deputación mantén cos concellos de Curtis e Coirós para a instrumentalización da xestión dos centros etnográficos situados en Teixeiro e Chelo, respectivamente.

No primeiro caso, o obxectivo é financiar a xestión do centro construído ao amparo do Proxecto Mandeo cunha achega provincial de 7.200 euros, o que supón o 100% do orzamento para a contratación do persoal.

Pola súa banda, o Concello de Curtis comprométese a fomentar as visitas organizadas para colexios e estudantes e abrir as instalacións de martes a venres de 10 a 13 e de 16 a 19 horas. Os sábados e domingos, de 10 a 13.

No que se refire ao Centro de interpretación do entorno fluvial do río Mandeo situado en Chelo, a Deputación achegará 4.500 euros para a contratación de persoal ata finais de ano, mentres que o concello encargarase da atención dos visitantes. Este centro abrirá venres, sábados e domingos de 10 a 13 horas e de 16 a 19.

PLAN DE RECUPERACIÓN DE CAMIÑOS DE TITULARIDADE MUNICIPAL

Por unanimidade dos membros da corporación, tamén se deu luz verde ao convenio que se asinará coa Consellería de Medio Rural e do Mar para financiar as actuacións do plan de mellora de camiños de titularidade municipal cofinanciado con fondos FEADER. A achega da Deputación será de 867.376,85 euros.

“Así conseguimos que as obras poidan estar iniciadas xa o 1 de xaneiro do ano que vén, porque deberán estar rematadas o 1 de novembro do 2016”, explicou o presidente provincial, Diego Calvo, que falou tamén do terceiro e último cambio que incluirá o POS 2015. “Prometemos discriminación positiva para os concellos fusionados e o estamos a cumprir, xa que este ano Oza-Cesuras leva as cantidades que lle correspondería a cada concello por cota fixa e se lles incrementa ademais o 20%”, matizou Calvo.

Lea también

Se reactivan as notificacións para levar a cabo queimas agrícolas por parte de particulares

A Xunta reactiva desde este martes 26 as notificacións para levar a cabo queimas agrícolas …