Erros e disfuncións nos letreiros municipais de Ferrol

burgoa-211114jjburgoa@hotmail.com-TIRANDO A DAR

Nestas últimas datas o Concello de Ferrol está a colocar unha serie de letreiros nas fachadas de significados edificios da cidade, subvencionados polo “Fondo de Desenvolvemento Rexional Europeo”. Os carteliños de cor gris fundición levan o brasón da cidade timbrado cunha coroa marquesal que non lle corresponde e conteñen numerosos erros e disfuncións, descoñecendo se teñen o propósito de informar ou de confundir ao viandante.

Primeiro letreiro. Edificio situado na Praza da Constitución, que neste intre constitúe a sede da Fundación dunha entidade bancaria. No letreiro que colocaron na fachada aparece escrito FUNDACIÓN NOVACAIXAGALICIA/ 1801 FRAY PLÁCIDO CAAMIÑA.

Trátase da antiga Cárcere Pública, construída polo arquitecto municipal López Llanos, edificio que logo albergou as dependencias do Concello de Ferrol. O ano 1927 foi Instituto de Ensinanza Media, e o ano 1944 o Goberno Militar da cidade. O edificio sufriu a adición de dous pisos o ano 1953 e o ano 2009 mudou a súa distribución interior. Estes son os datos auténticos do edificio; realmente o arquitecto Fray Plácido Caamiña nunca tivo nada que ver co mesmo.

burgoa-19-a

Segundo letreiro. Edificio esquinal, situado entre as rúas María e Sol, restaurado fai pouco tempo. No seu letreiro pódese ler ANTIGO HOSPICIO/1800-1830. Este edificio foi construído arredor do ano 1790, sendo destinado a vivendas co nome de Mesón de Valentín, albergando realmente o Hospicio Municipal desde o ano 1875 cando o Concello mercou e arranxou o edificio.

burgoa-19-b

Terceiro Letreiro. Edificio situado na esquina da rúa Magdalena con Méndez Núñez, hoxe utilizado, trala súa recente remodelación, como sede dun “totum revolutum” de asociacións culturais e veciñais da cidade. Neste caso no letreiro da fachada aparece escrito CENTRO CULTURAL CONCEPCIÓN ARENAL/ 1762

O edificio pertenceu ao legado que Pedro Carvajal de Castro fixo á Beneficencia Municipal de Ferrol ao falecer o ano 1887, albergando o Xulgado Municipal ata o ano 1953 e sendo logo a sede do Ateneo Ferrolán. É totalmente absurdo que lle poñan o nome da prestixiosa penalista Concepción Arenal a un edificio ao que realmente lle cumpriría levar o nome de ”Legado Carvajal de Castro”.

burgoa-19-c

Non coñecemos que Concellería (Cultura, Urbanismo, Turismo, Patrimonio ?) é a responsable da colocación destes letreiros e doutros máis en diferentes edificios da cidade. Sexa quen sexa, a Concellería responsable debe tomar acción e corrixir estes erros, encargando desta función a persoas coñecedoras do noso patrimonio cultural.

Lea también

Sabores ártabros-La porchetta, y otras porquerías

José Perales Garat  Pues la cosa es que en un pueblo de las inmediaciones de …