Presentada a candidatura do BNG-Asembleas Abertas no concello de Narón

A partir do vindeiro 24 de maio, o BNG-Asembleas Abertas pretende facer do concello de Narón unha ferramenta a favor do benestar dos veciños e veciñas. Para BNG-Asembleas Abertas as persoas son a prioridade de todas as súas políticas e propostas, de aí que pretendan “converter os concellos en verdadeiras ferramentas de dinamización económica e social, facendo que o local sexa o primeiro chanzo para lograr construír un país que saia da crise”, sinalou Vence. Foi na tarde deste mércores, día 6, na presentación da candidatura BNG-Asembleas Abertas en Narón, encabezada por Pablo Villamar, no local social da Gándara.

Para lograr esta dinamización do concello, entre as actuacións prioritarias de BNG-Asembleas Abertas están a aposta por un urbanismo sustentable, a valorización do patrimonio ou a revitalización do comercio de proximidade. “Queremos un concello para os veciños e veciñas, onde as persoas sexan as protagonistas e onde os cidadáns poidan gozar máis e mellor de Narón”, explicou o portavoz nacional. Engadiu que é importante conseguir que as persoas poidan facer máis vida nas rúas, logrando así darlle máis vida ás propias rúas e revitalizando, ao mesmo tempo, o comercio e o ocio.

Patrimonio e investimentos

Cremos que e imposible entender Narón ou calquera outro lugar sen amar o noso patrimonio”, subliñou o voceiro nacional. E por iso, dende BNG-Asembleas Abertas traballarán para darlle un maior impulso á valorización do patrimonio municipal, tanto o material -con rehabilitacións e melloras de edificios e lugares emblemáticos- coma o inmaterial -con proxectos para dinamizar a lingua e o legado histórico-.

Os membros da candidatura de BNG-Asembleas Abertas tamén destacaron este mércores que van loitar por lograr investimentos importantes para Narón que corresponden a outras administracións, “presionaremos e insistiremos para que se cumpran as promesas feitas aos veciños e veciñas”. Entre outros proxectos pendentes, salientaron o centro de saúde, o centro de ensino primario e secundario ou a xestión das escolas infantís.

Entre outras iniciativas prioritarias, dende BNG-Asembleas Abertas Narón destacaron a elaboración dun censo de locais comerciais dispoñibles para axilizar o asentamento de empresas, a aplicación de bonificación en impostos e taxas para os que queiran instalarse no concello, a posta en marcha dun plan de mobilidade que contemple a peonalización de rúas nas zonas máis urbanizadas ou a posta en marcha de orzamentos participativos.

Villamar: “O importante son as persoas”

Pola súa banda, o candidato do BNG-Asembleas Abertas de Narón, Pablo Villamar, subliñou que para o grupo de persoas que representa “o importante, como o foi ao longo deste mandato, son as persoas”. Nesa liña, insistiu en que será prioritaria a atención a aquelas familias en risco de exclusión social e destacou que nestes catro anos, “malia a crueldade da crise, fomos quen desde o goberno local de protexer os máis desfavorecidos”.

Villamar defendeu a acción de goberno do BNG, en concreto no referido ás medidas de persecución da fraude fiscal e a actualización dos padróns, que permitiu “levar adiante unha política recadatoria máis xusta e equilibrada”. O candidato nacionalista quixo facer especial fincapé no saneamento das contas do Concello e na redución do endebedamento, dous logros que permitirán ao vindeiro goberno local manter e mesmo incrementar os servizos sociais e crear as condicións máis axeitadas para favorecer o asentamento de empresas con medidas de bonificación nas taxas e impostos municipais.