Narón acolle un «Club de lectura fácil» para persoas con dificultades lectoras

A Biblioteca Municipal de Narón colaborará na actividade Club de lectura fácil, impulsada pola Asociación Nuestra Señora de Chamorro e que comezará a desenvolverse a partir do vindeiro mes de outubro. A concelleira de Bibliotecas, Mercedes Taibo, explicou que «se trata dunhas xornadas de lectura fácil que consisten na adaptación de libros, páxinas web e outros documentos para unha comprensión máis sinxela por parte dos lectores e que se dirixe a persoas con dificultades lectoras transitorias ou permanentes. Os interesados en inscribirse, de balde, poden facelo a partir de mañá, día 13, nas instalacións da Biblioteca Municipal ou chamando por teléfono ao número 981 382 173». A edil recordou que para poder participar é obrigatorio ter cumpridos dezaoito anos.

A adaptación dos textos realízase seguindo as directrices que ao respecto marca, en canto á linguaxe, ó contido e á forma, a Federación Internacional de asociacións e institucións bibliotecarias e Inclusion Europe. A responsable da área de Bibliotecas convidou á poboación inmigrante con dificultades para falar o noso idioma, persoas con escolarización deficiente, con trastornos de aprendizaxe, diversidade funcional ou discapacidade auditiva, entre outros colectivos, a acudir a estas convocatorias do Club de lectura fácil.

As sesións desenvolveranse a partir da primeira semana de outubro na Biblioteca Municipal, donde se organizarán varios grupos que se reunirán unha vez ao mes para ler materiais catalogados como «lectura fácil». Un grupo de monitores da Asociación Nuestra Señora de Chamorro será o encargado de traballar cos participantes. Previamente, na semana do 26 ao 30 de setembro, convocarase ás persoas inscritas a unha reunión na que se presentará máis polo miúdo esta actividade e se fixará a data de inicio do Club de lectura fácil.

A raíz desta iniciativa a Biblioteca Municipal de Narón disporá dunha sección propia con material de «lectura fácil», tal e como avanzou a concelleira da área.

Lea también

Almorzo para recadar fondos para o Centro de Recursos Solidarios de Narón

Unhas 250 persoas acudirán este sábado 30 á comida organizada para recaudar fondos para o …