Ábrese o prazo para participar no VII Concurso de Fotografía Cidade de Narón

A concellería de Turismo de Narónabrirá o vindeiro mércores, 2 de novembro, o prazo de presentación de imaxes ao VII Concurso de Fotografía Cidade de Narón. A concelleira da área, Natalia Hermida, explicou que os traballos poderán presentarse ata o 18 de novembro (incluído) no Rexistro municipal ou no quinto andar do Concello, entre as 8:30 e as 13:30 horas. Os participantes deben ser maiores de idade e a temática das imaxes, concretamente sobre a riqueza de Narón, tanto a nivel patrimonial como sobre espazos naturais de interese, de lecer, culturais, tecnolóxicos ou festas populares, sendo obrigatorio que se recoñeza que o lugar ou o seu entorno é na localidade. En total repartirase unha partida de 1.200 euros en premios.

Cada concursante poderá presentar (nun sobre, con pseudónimo e cunha copia en CD das imaxes) ata tres fotografías, en cor ou en branco e negro, cunha resolución mínima de 1024×768 píxels e nos formatos JPG, TIFF ou PNG. As imaxes non deberán estar retocadas e opcionalmente cabe a posibilidade de presentalas en formato papel, cun tamaño mínimo de 20×25 e máximo de 30×45 centímetros. O gañador do primeiro premio recibirá 750 euros en metálico, se ben o segundo e o terceiro están dotados con 300 e 150 respectivamente. O xurado valorará a calidade técnico-artística da imaxe (15 puntos); a orixinalidade (10) e o grao de representatividade do Concello (5). Os premios entregaranse nun acto público que se convocará desde o Consistorio.

A concelleira de Turismo recordou que ao igual que en anteriores convocatorias «as tres imaxes premiadas, ademais doutras que se presenten a este certame, ilustrarán o calendario de sobremesa do Concello de Narón para o vindeiro ano 2017».

As persoas interesadas en presentarse a esta nova edición do concurso poden consultar as bases completas do mesmo na páxina web do Concello de Narón –www.naron.es- e para calquera aclaración pódese chamar tamén ao número de teléfono 981 337 700 (ext. 1517).

Lea también

Inaugurouse en Xuvia a sexta edición do programa “Verde que te quero verde”

A praza Irmáns Freire, en Xuvia, acolleu este domingo os dous primeiros espectáculos do programa …