O PAI da Deputación reduce en 4 millóns de euros a débeda dos concellos de Ferrolterra

Desde a Deputación de A Coruña informaron que o Plan de Aforro e Investimentos (PAI) provincial, nas súas convocatorias de 2015 e 2016, «permitiu que os concellos das comarcas de Ferrol, Eume e Ortegal reducisen a súa débeda en 3.999.278 euros». «Esta axuda ás economías municipais consiste nun programa anual de créditos sen xuros que a Deputación pon a disposición dos concellos que o soliciten para facilitar a amortización da súa débeda e financiar obras, en función do seu nivel de endebedamento», fixeron saber, asegurando que «os municipios só teñen que devolver o importe principal prestado, nun prazo de dez anos. Ademais, a Deputación vén de aprobar, no último pleno, a ampliación do prazo de carencia, que pasa de dous a catro anos».

Dos 17 concellos de Ferrol, Eume e Ortegal que solicitaron fondos do PAI en 2015 e 2016, catro dedicaron a súa asignación unicamente á redución de débeda. Trátase de Ares (269.186 euros), Moeche (130.065 euros), Neda (261.989 euros) e Ortigueira (760.157 euros). Doutra banda, cinco concellos demandaron só investimentos : Mañón (329.000 euros), Pontedeume (169.000 euros), As Pontes (352.775 euros), San Sadurniño (207.294 euros) e As Somozas (399.571 euros).

Os oito concellos restantes optaron por combinar ambas fórmulas. É o caso de Cabanas, con 83.342 euros para redución de débeda e 96.428 de investimentos; Cedeira, con 226.945 euros para redución de débeda e 212.115 para investimentos; Fene, 72.436 euros para redución de débeda e 378.271 para investimentos; Ferrol,  556.420 para redución de débeda e 356.598,18 para investimentos; Monfero, 91.923 euros para redución de débeda e 194.600 para investimentos; Narón, 905.817 euros para redución de débeda e  83.744 para investimentos; Valdoviño, 396.282 € para redución de débeda e 31.009  para investimentos,  e Cariño, 244.711 para redución de débeda e 47.039 para investimentos.

En total, o PAI da Deputación deixa 2.957.449 euros para investimentos e case catro millóns para redución de débeda nos concellos de Ferrol, Eume e Ortegal.

Casa da Xuventude e Centro Municipal de Empresas en San Sadurniño

Entre os investimentos que financian os fondos da Deputación na zona, atópase a creación da Casa da Xuventude e do Centro Municipal de Empresas en San Sadurniño.

A axuda provincial ascende a 84.500 euros para a execución da nova Casa da Xuventude, que se situará no Convento do Rosario, no espazo antes dedicado ao cuartel da Garda Civil e á oficina municipal de emprego. Estes novos locais estarán a disposición dos mozos do concello, para que poidan desenvolver actividades variadas, cursos e obradoiros. O espazo tamén contará con locais de ensaio e unha sala de gravacións totalmente acondicionados acusticamente.

A intervención respectará ao máximo posible o antigo convento, conservando todos os elementos en bo estado. Ademais, introduciranse instalacións e mecanismos sostibles e respectuosos co medio ambiente, e medidas de accesibilidade e eliminación de barreiras para as persoas con mobilidade reducida.

Os sadurniñeses tamén contarán cun novo Centro Municipal de Empresas, grazas á axuda de 69.370 euros do Plan de Aforro e Investimentos. Este espazo contará con máis de 390 metros cadrados, no Lugar do Casal, no edificio coñecido como o Anexo ao Pazo da Marquesa.

Así mesmo, o PAI financia outras obras en San Sadurniño coma a pavimentación dos camiños de Cadavás, O Seixo e A Fraga, con 53.424 euros.

Outras actuacións financiadas polo PAI para a mellora de edificios sociais e áreas de ocio público executaranse no centro cívico ferrolán Carvalho Calero e nas pistas polideportivas e parques infantís de Fene.

O concello de Ferrol destinará 116.798 euros a reparar a cuberta do centro cívico situada na praza do Inferniño, deteriorado a causa de filtracións de auga de choiva.

Doutra banda, en Fene acondicionarase a pista polideportiva de Magalofes, con actuacións coma a reposición do sistema eléctrico, a carpintería exterior da fachada principal, o pintado interior do edificio e o subministro e montaxe de postes e rede para tenis. Este proxecto, financiado con 42.915 euros do PAI, tamén inclúe a adecuación de áreas de xogos infantís na Praza do Ameneiral (Perlío), a Praza do 10 de Marzo (San Valentín) e os parques Rosalía de Castro (Perlío) e Hortiña (Limodre).

Acondicionamento e mellora de viais

Unha gran cantidade de sendas, estradas e camiños serán mellorados con cargo ao PAI. É o caso da pista ao Mirador da Miranda, lugar de alto interese turístico do concello de Cariño. Un total de 47.039 euros do PAI irán destinados á reparación e pavimentación desta vía, que discorre en dirección a San Andrés de Teixido, ata un miradoiro que permite contemplar unha panorámica da vila de Cariño e de practicamente a totalidade da ría de Ortigueira, ademais da riqueza medioambiental da Serra da Capelada.

Varios viais de Ferrol recibirán unha inxección económica de 148.220 euros para acometer melloras e reparar deficiencias. En concreto, os tramos que se reformarán con cargo ao PAI sitúanse en Caranza, Serantes, Santa Marina e Recimil.

No concello de Monfero, a axuda de 163.076 euros da Deputación permitirá a reparación e mantemento da rede viaria municipal en Taboada e Val Xestoso, que presenta varias deficiencias na capa de rodaxe, co conseguinte perigo e prexuízo para os veciños. Ditos traballos executaranse entre Escollera e Eume, na parroquia de Taboada, e no tramo entre e Camiño Foxo, Abeleira e Casa da Fragas, na parroquia de Val Xestoso.

En Mañón, executaranse reparacións en accesos ao centro escolar do Barqueiro (33.738 euros) e tamén no firme da Rúa Landín Carrasco, en Bares, e no Camiño Bico do Seixo ao Fabriquín (33.138 euros). Así mesmo, o PAI financia con 71.170 euros melloras na iluminación do área recreativa de Mogor e da casa do Concello.

Nesta mesma liña, o concello de Fene utilizará 57.856 euros dos fondos provinciais para executar a pavimentación dos camiños da Revolta e Formosende (Fene), a rúa río Cádavo (Perlío), o Camiño do Castro desde os Loureiros (Barallobre) e os camiños de Valadoiro e do Valado (Sillobre). Tamén en Fene pavimentarase o Camiño do Catalán, na parroquia de Maniños, con cargo a 80.451 euros do Plan de Aforro e Investimentos.

Lea también

Concello de Moeche e Asociación ecuestre 23 de Abril asinan o convenio para a feira cabalar

A alcaldesa de Moeche, Beatriz Bascoy, e a nova presidenta da Asociación ecuestre 23 de …