Recollidos os primeiros premios da campaña «Comercio de Narón, en Nadal e sempre»

O alcalde de Narón, José Manuel Blanco; o concelleiro de Promoción Económica, Pablo Villamar, e a presidenta da Asociación de Comerciantes de Narón (ACN), Olga Ameneiro, entregaron esta mañá no Concello as dúas primeiras cestas da campaña Comercio de Narón, en Nadal e sempre impulsada polo Consistorio e a ACN. Miguel Neira Aneiros e Marcial Calvo Agras recibiron cada un a súa cesta cunha gran variedade de produtos de Nadal. As papeletas premiadas sorteáronse nos establecementos Zona PC e Mi Nené, se ben a propietaria deste último, Lucía García, acudiu tamén ao acto celebrado hoxe.

Os representantes do goberno local e da ACN felicitaron aos dous galardoados no primeiro dos sorteos desta campaña de Nadal. O edil de Promoción Económica, Pablo Villamar, destacou o feito de que «as persoas que compran estes días en Narón poden gozar da programación de Nadal, ao tempo que dos seus establecementos e tamén obter un dos premios desta iniciativa». Pola súa parte, Olga Ameneiro agradeceu a implicación dos preto de 140 comercios que participan este ano na iniciativa e tamén das persoas que apostan polo pequeno comercio local para realizar as súas compras.

Finalmente o alcalde, José Manuel Blanco, felicitou aos premiados e animounos a continuar realizando compras nos establecementos adheridos á campaña –que poden consultarse na web: www.comerciodenaron.es, e dos que destacou a súa calidade e variedade-, para así optar ao resto de premios que se entregarán nos vindeiros días. Esta mesma semana sortearanse outras dúas cestas con produtos de Nadal e o 11 de xaneiro dous vales por importe de 500 euros e outros dous de 300 que deberán gastarse nos comercios desta campaña os días 16 e 17 de xaneiro.

Lea también

II Xornadas Micolóxicas de Narón

O Consistorio organiza unha nova edición, a segunda, das Xornadas Micolóxicas Concello de Narón. A …