Ferrol é unha das tres cidades galegas máis transparentes

O Concello de Ferrol sitúase como a terceira cidade galega máis transparente da nosa Comunidade, segundo o ranking publicado o pasado venres 7 de xullo, pola organización Transparencia Internacional España, no cal se analiza a transparencia dos 110 maiores concellos de España.

Deste xeito adiántalle no eido da transparencia ás cidades da Coruña, Lugo, Pontevedra e Ourense, que quedan en postos inferiores.

Ferrol obtivo concretamente 86,3 puntos sobre 100 na valoración global, experimentando así a maior suba rexistrada dende o ano 2009, xa que a puntuación acadada polo Concello na edición do ano 2017 foi 15 puntos superior á anterior do ano 2014 (71,3 puntos).

A entidade local presenta os seus mellores resultados en dous eidos concretos, nos cales Ferrol se sitúa por enriba da media española; por unha banda no bloque da transparencia na páxina web, relacións coa cidadanía e a sociedade e participación cidadá (93.3/100) no que sobe dende os 68,8 puntos do ano 2014, e por outra, no bloque da transparencia económica-financeira (95.5/100), 22,8 puntos máis que na edición anterior.

Nas demais áreas a puntuación obtida achégase cada vez máis a media española, cómpre destacar o importante aumento acadado en eidos coma o da transparencia activa e información sobre a Corporación municipal ao sumar 18,3 puntos máis respecto do resultado do ano 2014, situándose así a tan só 2,2 puntos da media estatal.