O Camiño Arriba, en San Sadurniño, está desde hoxe en festas

Para a xente de fóra -e tamén para algunha de aquí-, velaí unha información importante: o Camiño Arriba está situado ao norte da parroquia de Lamas, na súa parte máis alta, lindando con Bardaos e Santa Mariña. Hai quen reivindica esta parte do territorio como parroquia de seu e case que cumpriría con todos os requisitos. Ten un territorio delimitado, asociación veciñal propia, pista de fútbol sala, bar… só lle falta a igrexa. Para o caso serviría que ten capela e santo a quen honrar, San Estevo, a quen precisamente desde hoxe lle renden tributo como mellor se pode facer: con misa, “fuegho”, música e mesas cheas de fartura.

Este ano a comisión preparou un programa que arranca esta noite de venres cunha velada de petiscos e “beberes” á que está convidada toda a veciñanza e a xente que colabora cos festexos. Será un xeito de quentar motores en plan arrincadeira suave antes da troula do sábado e do domingo.

Mañá, primeiro día de festa propiamente dito, a xornada comezará co toque de diana que se dá cos foguetes co obxectivo de erguer da cama a propios e avisar aos de lonxe de que hai festa no Camiño Arriba. A misa está posta para as 13.00h. na capela do santo -situada nas entremedias do Freixo e Portolamas- que é peculiar polo seu cruceiro de toelo, tan pegado á edificación que é imposible velo pola parte traseira. O cruceiro data de 1931 e é dos máis modernos de todos cantos se contan en San Sadurniño, un dos concellos da volta con máis símbolos deste tipo.

A sesión vermú celebrarase -como é habitual- na explanada da cooperativa, moi preto da capela. Estará animada pola orquestra Alaska, que tamén actuará pola noite compartindo verbena co incansable Grupo Pasión.

O domingo a misa adiantarase ás 12.00h. e tamén a sesión vermú posterior, que arrancará sobre as 13.00h. coa orquestra Alcázar e un extended play co que finalizará a parte musical do Santo Estevo, xa que á noite non haberá festa.

Quen foi Santo Estevo?

San Estevo é, segundo a tradición cristiá, o primeiro mártir da Igrexa. Disque o mataron a pedradas no ano 37 por andar reivindicando a figura de Cristo e as súas ensinanzas, contrarias á lei xudía. Disque.

O seu día é o 26 de decembro e a primeiros de agosto -o día 3- é cando se conmemora o achádego do seu corpo nos arrabaldos de Xerusalén en tempos do emperador Honorio (s. V ). Quizais sexa esta última data a que se celebra no Camiño Arriba. Ou quizais sexa a do 26 de decembro trasladada ao verán por aquilo de que os días son máis longos e con mellor tempo. Quen sabe, ao mellor -case fixo- este San Estevo é resultado da asimilación católica de ritos anteriores relacionados coas colleitas da més.

Lea también

Decomisados en Mugardos 167 kilos de vieira y los utensilios empleados para extraerlos ilegalmente

La Patrulla de Protección de la Naturaleza (Paprona) de la Guardia Civil en colaboración con …