Galicia Ártabra Digital Noticias de Ferrol y la comarca de Ferrolterra.
Por segundo ano consecutivo, e tralo éxito de convocatoria do pasado verán, o Concello organiza a Ruta Cicloturista de Cabanas. Será este sábado, 26 de agosto, e está aberta á participación de toda a familia. Nenos e maiores poderán tomar parte, con percorridos adaptados ás idades. O primeiro, duns 19 kms, está pensado para maiores de 8 anos e comezará ás 17 horas e, o segundo, de 2,5 kms –treito final do primeiro- vai dirixido a todas as idades e arrancará ás 19 h. Para a organización da ruta, o Concello conta novamente coa colaboración da SCRYD San Mamede de Laraxe, cuxa sede será punto de partida e chegada. Tamén a AVV de Santa Cruz presta o seu apoio en tarefas loxísticas.
É gratuíta e ten un marcado carácter solidario, xa que para participar haberá que entregar un mínimo de dous quilos de alimentos que terán como destino o Banco de Alimentos de Cabanas. Iso si, é preciso inscrición previa. Pode formalizarse na casa consistorial ou na SCRYD San Mamede de Laraxe.
Xincana infantil ó remate da ruta
Será obrigatorio o uso do casco e, ó remate da ruta, os participantes máis novos poderán participar nunha xincana no local da SCRYD San Mamede, pensada especialmente para o disfrute dos máis pequenos, que recibirán unha medalla en caso de completala.
