Un mal tercer cuarto condena o Baloncesto Narón

O Baloncesto Narón volveu caer no segundo partido da Copa Galicia EBA, neste caso fronte o Santo Domingo de Betanzos, por 71-84, co que perde toda posibilidade de disputar a final da competición.

O encontro estivo igualado durante a primeira parte, que rematou con tres puntos de vantaxe para os pupilos de Miguel Maseda (40-37) logo de manter a renda que acadara no primeiro periodo (20-17). O conxunto local exhibiu unha maior cohesión e máis acerto ca no primeiro choque da competición -o domingo pasado contra o filial do Obradoiro-.

Con todo, na reanudación o Baloncesto Narón foi superado con contundencia polos betanceiros, que lle endosaron un 12-30 de parcial no terceiro cuarto. Con todo en contra e unha desvantaxe importante (52-67), os de Miguel Maseda botaron o resto e intentaron a remontada de todas as maneiras, mais a diferenza no inicio do periodo final era tan grande que o fixo imposible (71-84).

O Baloncesto Narón visita o domingo pola tarde ao Basquet Coruña no que será o seu último partido nesta edición da Copa Galicia EBA.