O convenio de colaboración entre o Concello e a Asociación Terra Rendible sobre ordenación forestal avanza no rural de Narón

A alcaldesa de Narón, Marián Ferreiro, e o concelleiro de Promoción Económica, Pablo Villamar, desprazáronse na mañá deste mércores xunto con Carlos Caaveiro, enxeñeiro forestal da Asociación Terra Rendible, a varias parcelas de xestión de monte tutelado pola entidade localizadas na zona rural. O Concello mantén desde hai catro anos un convenio de colaboración con Terra Rendible –o último por un importe de 12.000 euros anuais- en base ao que se aposta pola ordenación das explotacións forestais no termo municipal, tal e como recordou Ferreiro.

O edil de Promoción Económica, Pablo Villamar, subliñou a importancia deste acordo, en canto que contribúe a “facer unha explotación racional do monte respectando as distancias de plantación e posibilitando accesos para facilitar a entrada ante posibles casos de incendios”. O concelleiro naronés destacou o feito de que “desde Terra Rendible se asesora aos propietarios das parcelas de todo o proceso, desde a plantación das árbores ata o momento da corta e posterior venda”.

En representación de Terra Rendible, Caaveiro asegurou que na actualidade “xa se empezan a ver os froitos dun traballo colectivo, que é tamén un traballo divulgativo de ensinarlle á xente como convertirse de propietarios en silvicultores”. O enxeñeiro destacou o feito de que “cada vez chegamos a máis xente e somos capaces de ir ordenando mellor o territorio” e subliñou a importancia de respectar e seguir unha serie de normativas e criterios de cara a ter producións “sustentables e rendibles”, así como do “traballo conxunto para obter maiores beneficios económicos”.

Pola súa parte, a alcaldesa, Marián Ferreiro, recordou que a entidade, constituída en Narón, conta actualmente con máis dun centenar de socios e destacou a labor que desenvolven en canto ao asesoramento dos mesmos “para obter unha maior rendabilidade das superficies plantadas e, ao tempo, informar sobre cómo ordenar o monte, algo que é moi importante para evitar posibles riscos”.

Durante parte da mañá, Ferreiro, Villamar e Caaveiro, visitaron varias parcelas da zona rural de Narón nas que os propietarios contaron co asesoramento do equipo de Terra Rendible. A distancia das plantacións das diferentes especies e a aposta por castiñeiros, cereixos e carballos en terreos forestais son xa visibles en varias fincas de Sedes e doutras parroquias de Narón.

A alcaldesa aproveitou o encontro deste mércores para valorar o traballo de Terra Rendible e abordar tamén novas colaboracións entre a administración local e a asociación en virtude ao convenio actualmente en vigor.