Os participantes no programa Sicted de calidade turística recibiron as súas acreditacións no Torrente Ballester

Foto de familia tras a entrega de diplomas | Concello de Ferrol

As empresas e entidades que participan no programa Sicted (Sistema Integral de Calidad Turística Española en Destinos), que promove a Secretaría de Estado de Turismo coa colaboración da Federación Española de Municipios e Provincias, recolleron onte no Centro Torrente Ballester as súas acreditacións tras ter superado o proceso de avaliación para obter o distintivo de calidade turística ou telo renovado este ano. Presidiron o acto o alcalde, Ángel Mato; a concelleira de Turismo, María Teresa Deus; o presidente da Asociación de Empresarios de Hostalería, Emilio Vázquez; es as concelleiras do grupo do Partido Popular María del Carmen García e Ana Leira.

Rey Vázquez animou na súa intervención a que as empresas participen no programa, que é “moi esixente” pero tamén “unha garantía”. Deus asegurou que acadar este selo de calidade supón “unha tarefa diaria moi estricta” e que desde Ferrol “estase a facer un bo traballo” no eido do turismo. Por elo, deu as súas felicitacións a todos os participantes e invitounos a que continúen coa mesma liña. “Que cada vez sexades máis”, desexou a edil, porque, se se prima a calidade, dixo, “o turismo vai medrar”.

Ángel Mato insistiu na aposta por esa calidade como “o obxectivo clave” e unha aposta que “permite competir” no sector turístico. O alcalde dixo que a cidade “ten moitos valores que amosar”, algúns vinculados ao seu “carácter industrial”, pero tamén de outros eidos. Asegurou que para o Concello é “un orgullo” apoiar o traballo que levan a cabo entidades e empresas como as que estaban representadas no patio do Torrente e afirmou que son “os mellores embaixadores” dun Ferrol que é “único, singular”, polo que debe aproveitar a “expansión sen precedentes” que vive o turismo. Por iso, pediulles que continúen a “poñer en valor a cidade”. Os distintivos do Sicted, dixo, “son unha pequena contribución” a que se acade este obxectivo.

Lea también

O Concello reúne a 23 mozos de cinco países no primeiro Masterchef Saudable no mercado de A Magdalena

O Concello de Ferrol, a través da concellería de Xuventude, que dirixe Cristina Prados, acaba …

Deja un comentario

Tu dirección de correo electrónico no será publicada. Los campos obligatorios están marcados con *