O alcalde chama no acto con motivo do aniversario da Constitución a “valorar todo o que nos une”

Ángel Mato e Ángel Judel no acto do Día da Constitución | Concello de Ferrol

O Concello de Ferrol celebrou hoxe o tradicional acto institucional con motivo do aniversario da Constitución. Este ano, o invitado a pronunciar a conferencia foi o presidente da Sección Primeira da Audiencia Provincial, o maxistrado Ángel Judel Prieto. O alcalde, Ángel Mato, recibiuno no seu despacho antes da firma no libro de ouro e da entrega do agasallo institucional. Alí tamén puido reunirse cos voceiros dos grupos municipais.

Durante a recepción da corporación municipal no salón de sesións, á que asistiron autoridades civís e militares e representantes da sociedade ferrolá, o alcalde lembrou que o marco de estabilidade que a Carta Magna de 1978 lle proporcionou ao país fixo posible “unha prosperidade da que nunca antes gozaramos”. Mato destacou que o valor da Constitución reside no “esforzo por superar as diferenzas en favor do ben común” que moveu á sociedade da Transición. Por iso, chamou a “valorar todo o que nos une e desbotar o que nos poida afastar”.

Judel pronunciou a continuación a conferencia A Constitución, mañá, na que insistiu na vixencia dos valores do 78 neste “momento convulso que vivimos”, aínda que recoñeceu que “o pacto da Transición quebrou” neste século e é necesario repensalo. Referiuse aos grandes retos que afronta a nosa sociedade e que deberan ser recollidos nunha actualización da Constitución, pero lembrou que o problema do independentismo “núbrao todo”. No seu repaso aos momentos iniciais do texto constitucional, á situación política de España no impasse entre a morte de Franco e o 78, dixo que tocou dirimir “o vello dilema entre monarquía ou república”, ao que se contestou “democracia”.
Para Ángel Judel, chegou a hora de pensar nunha reforma da Constitución para que as novas xeracións poidan participar dela, “fundamentalmente os movementos que entón non estaban”, como son o ecoloxismo e o feminismo. O interesante sería, dixo, reformar “non o núcleo duro da Constitución”, senón outras cuestións, para que se puidesen volver votar en referendo.

Finalizada a conferencia, os asistentes foron convidados a un aperitivo no salón de recepcións do pazo municipal.

Lea también

Los bomberos de Ferrol dejan de prestar servicio en otros seis municipios de la comarca

El presidente de la junta de personal del Ayuntamiento de Ferrol, Javier Sandá (CSIF), ha …