A primeira xornada da campaña municipal para combater o consumo de alcol e drogas entre menores rexistra 157 intervencións no Cantón

O Concello de Ferrol, a través da concellería de Benestar Social, que dirixe Eva Martínez Montero, executou o pasado 5 de decembro a primeira intervención da campaña “Educando no Lecer”, unha iniciativa que nace co obxectivo de combater o botellón e reducir o consumo de drogas entre os mozos.

O programa, impulsado polo goberno local en colaboración con Asfedro (Asociación Ferrolana de Drogodependencias), contempla catro actuacións con motivo das festas do Nadal. A primeira delas, no Cantón de Molíns, iniciouse ás 23.30 horas e rematou ás 3 de mañá. Rexistrou un total de 157 intervencións —89 homes e 68 mulleres— levadas a cabo entre os servizos de análise de substancias, o subministro de información respecto aos riscos do consumo de drogas e a repartición de auga, petiscos e sacas de lixo.

Foron varios educadores sociais e persoal voluntario os encargados de atender aos mozos que se achegaban á carpa. Destacan que foron “poucas as persoas” que fixeron referencia ao alcol como “substancia que xera riscos” e foron os propios técnicos os que lanzaron dita reflexión a través das diferentes estratexias, segundo indican desde a concellería de Benestar Social. Tamén se incidiu no “consumo abusivo de tabaco”.

Pola súa banda, Martínez indicou que “a meirande parte dos que ata alí acudiron manifestaron a súa satisfacción polo servizo que recibiron” e moitos “achegáronse a posteriori con amigos”.

Repetirase no Cantón e na rúa María

Por todo iso, a edil de Benestar Social fai un balance “moi positivo” do programa e sinala que “queda demostrada a idoneidade” da posta en marcha desta iniciativa, que se repetirá o 20 de decembro no Cantón, o 31 na rúa María e o 5 de xaneiro de novo no Cantón.

Desde a concellería “estamos moi satisfeitos”, sobre todo “tendo en conta que ao tratase da primeira actuación, a presenza dos educadores sociais e voluntarios podía xerar certa desconfianza”. O “éxito” da campaña pon de manifesto que a concellería de Benestar Social ten unha “importante demanda social” ante o que é un “problema moi serio, o consumo de drogas entre menores”.