O Concello busca unir ata 5 novas empresas ao proxecto turístico Sicted deste ano

O Concello de Ferrol, a través da súa Sociedade Mixta de Turismo, participará un ano máis en Sicted, un proxecto nacional que busca mellorar a calidade turística dos destinos participantes a través da formación e asesoramento a empresas e servizos en máis de 30 categorías: hoteis, restaurantes, cafeterías, museos, taxis, axencias de viaxes, comercios, empresas de turismo activo o establecementos rurais, entre outros.

A edición deste ano comezará en marzo e o Concello busca incorporar cinco novas entidades ás 32 que xa forman parte desta iniciativa. Xa hai unha confirmada, o hotel Real, e as empresas interesadas en ocupar as outras catro prazas poden formalizar a súa inscrición ata o 13 de marzo a través do mail mlopezturismo@ferrol.es. Na pasada edición incorporáronse dúas novas firmas.

Este ano será a consultora turística galega Avivae a encargada de implantar a metodoloxía Sicted. É unha iniciativa deseñada pola Secretaría de Estado de Turismo (Turespaña) co apoio da Federación Española de Municipios e Provincias (Femp) que busca instaurar un nivel de calidade homoxéneo nos servizos prestados ao visitante dentro dun mesmo destino. Ofrece manuais de boas prácticas para cada sector e asesoría individualizada.

Nesta plataforma os sectores público e privado traballan conxuntamente para ofrecer ao visitante unha oferta turística de calidade e mellorar a imaxe do destino. Os integrantes no programa mostran o distintivo de Sictel.

Ferrol incorporouse no ano 2012 e na actualidade hai 199 destinos en toda España, dos que 10 son galegos.

Acto de entrega a final de ano

O proxecto está financiado pola Sociedade Mixta de Turismo de Ferrol en colaboración coa Deputación da Coruña. Entre as accións que levará a cabo Avivae para implantar a metodoloxía Sicted entre os meses de marzo e xuño atópanse cursos de formación colectiva e asesoramento, visitas individualizadas ás empresas participantes para aclarar dúbidas sobre o proxecto e apoio na posta en marcha dun plan de mellora. Tamén avaliaranse ás empresas para comprobar si cumpren os requisitos estipulados no manual de boas prácticas para obter o distintivo.

O curso rematará coa celebración da Mesa de Calidade Turística de Ferrol para expoñer os resultados do proxecto e analizar as propostas de mellora. As distincións desta edición entregaranse nun acto público no último trimestre do ano que terá lugar no pazo municipal.

Lea también

Los Mupis de Ferrol promocionan la Semana Santa

El Ayuntamiento de Ferrol ha actualizado los mupis que dan la bienvenida a la ciudad …